|
3-MAVZU: BORLIQ (ONTOLOGIYA) VA METАFIZIKA.
REJA:
1. Borliq tushunchasining tahlili. Falsafa tarixida borliq muammosi.
2. Borliqning shakllarining tasnifi.
3. Harakat – materiyaning yashash sharti.
Mavzuning tayanch iboralari: Olam, monizm, dualizm, plyuralizm, substansiya, substrat, individual olam, ijtimoiy olam, real olam, virtual olam;borliq, yo‘qlik, mavjudlik, reallik, materiya, fazo, vaqt, harakat; narsalar borlig‘i, tabiat borlig‘i, inson yaratgan buyumlar borlig‘i, inson borlig‘i; ma’naviy borliq, individual borliq, ijtimoiy borliq.
1. Borliq tushunchasining tahlili. Falsafa tarixida borliq muammosi.
Borliq nima degan masala hamisha falsafiy tafakkurning asosi bo‘lib kelgan. Kishilarning olam to‘g‘risidagi ilmiy- falsafiy dunyoqarashini tarkib toptirishda ularning borliq haqidagi qarashlari alohida o‘rin tutgan.
Hozirgi zamon falsafiy adabiyotlarida “borliq” tushunchasini tor va keng ma’noda qo‘llash hollariga duch kelamiz. Tor ma’noda “borliq” ongga bog‘liq bo‘lmagan ob’ektiv olam, keng ma’noda - bu barcha mavjud narsalardir.
Borliq to‘g‘risidagi dastlabki tasavvurlar qadimgi dostonlarda, ertaklarda, diniy madhiyalarda uchraydi. Bu masalada qadimgi Hind, Xitoy, yunon yodgorliklari katta material berishi mumkin.
Qo‘hna Hindistonda yaratilgan qadimgi diniy madhiyalarda, xususan “Maxabharata”, “Rigveda”, “Ramayana”, “Upanishad”larda odamning yaratilishi xususida gap borganda, “yo‘qlik” va “borliq” haqida ma’lumotlar beriladi. “Rigveda”da aytilishicha, olamning paydo bo‘lishida “asat”deb ataluvchi ibtido bosh rolni o‘ynagan. “Asat” imkoniy borliq, ya’ni “yo‘qlik” demakdir. “Asat” asta-sekin “sat” (”mavjudlik”)ka aylangan.
Qadimgi Xitoyda keng tarqalgan daosizmning asoschisi Lao-szining fikricha, “borliq” asosida “dao” yotadi. U “si” elementi bilan birgalikda hayot negizini tashkil etadi. Qadimgi yunon falsafasida, ayniqsa Geraklit qarashlarida bu masala muhim o‘rin tutgan. Uning fikricha, ayni bir jism ayni vaqtda ham “mavjud”, ham “mavjud emas”. Demokrit aytadiki, “borliq” “yo‘qlik” bo‘lishini talab etadi. Borliq “qattiqlik” yoki moddiylikdir. “Yo‘qlik” esa “bo‘shliq”dan iborat, ammo har ikkalasi ham mavjuddir. Aflotun borliq deganda moddiy jismlarni tushungan. Narsalar borlig‘ini g‘oyalar dunyosi borlig‘idan farqlagan. Aflotun borliqni “chin” va “chin bo‘lmagan”ga ajratadi. G‘oyalar dunyosi “chin”, narsalar dunyosi esa “chin bo‘lmagan”ga kiradi. Aflotun olamni narsalar borlig‘iga bo‘lib yuborish bilan birga, ayni vaqtda “g‘oyalar” dunyosi mavjudligini narsalar borlig‘i bilan qo‘shishga urinadi.
Yaqin va O‘rta Sharq falsafasida Kindiy, Forobiy, Ibn Sino, Umar Hayyom, Ibn Rushd kabilar borliqni ikkiga - vujudi mumkin va vujudi vojibga bo‘ladilar. Ularning falsafasida borliqning bosh sababchisi Alloh (vujudi vojib)dir. Demak, Alloh va u yaratgan narsalar bir-birlari bilan o‘zaro bog‘langan birlikni tashkil etadi. Chunonchi, Jomiy shunday yozadi: “Tangrini olamdan ajralgan deb hisoblama, zeroki, barcha olam tangridadir, Tangri esa olamda”. (Qarang: B.Iskandarov. Tasavvuf falsafasi. T. 1995, 21b.)
Borliq muammosining hayotiy ildizlari va falsafiy ma’nosi ni tushunib yetish muhimdir. Borliq va yo‘qlik to‘g‘risidagi tasavvurlar qanday paydo bo‘lgan? Insoniyat qadimdan boshlab olam borlig‘i, o‘z borlig‘i, o‘zgalar borlig‘i ustida bosh qotirgan. Olam azaldan bormi? Yoki yaratilganmi? Odamlar-chi? Odam tug‘iladi, yashaydi, voyaga yetadi, bir kun kelib olamdan ko‘z yumadi, u bor edi, bo‘lgan edi, endi yo‘q, lomakon bag‘riga singib ketadi, yo‘qlik sari yo‘l oladi. Tug‘ilish bor ekan, o‘lim haq. Bu - hayot qonuni. Samad Vurg‘un to‘g‘ri ta’kidlaganidek, “to‘rt faslni o‘tkazmoqlik tabiatga bir qonun, tug‘ilmoqlik va o‘lmoqlik bu hayotga bir qonun”.
Inson hayotidagi fojialar ichida eng dahshatlisi o‘limdir. O‘lish vahimasi odamlar irodasini o‘ziga rom qilgan. O‘lim nima? U borliqmi yoki yo‘qlikmi? Odamlar uni bilishga qiziqqanlar, javob izlaganlar. Chunonchi, V. Shekspir Gamlet tilidan quyidagilarni bayon qilgan edi: “Yashash kerakmi, o‘lish kerakmi? Nadir afzal? Mana masala. O‘lish unutilish, u qandayin diyorki, unga borgan yo‘lovchi ko‘p, ammo undan qaytgan biror bir yo‘lchi yo‘q.”
Demak, borliq keng ma’noda mavjudlik to‘g‘risidagi eng umumiy tushunchadir. Borliq va reallik g‘oyat keng tushunchalar - sinonimlardir. Borliq mavjud barcha ko‘rinadigan va ko‘rinmaydigan narsalar. Bular - moddiy narsalar, jarayonlar (fizik, kimyoviy, biologik, ijtimoiy, ruhiy, ma’naviy va x.k. ), bu -ularning xossalari, aloqalari va munosabatlaridir. Fantaziyaning mahsuloti bo‘lgan ertaklar, miflar, eng nozik xayollar - bular ham ma’naviy reallikning ko‘rinishlari, borliqning tarkibiy qismi sifatida bor narsalardir.
Borliqning teskarisi “Yo‘qlik” hisoblanadi. Borliq va Yo‘qlik biri-birisiz mavjud emas, agar ularning bir-biriga o‘tishi bartaraf qilinsa, hamma narsa o‘z ahamiyatini yo‘qotishi mumkin. Nega? Chunki harakat to‘xtashi mumkin, bunda mavjudlik o‘zining muhim, asosiy va ajralmas belgilaridan mahrum bo‘ladi. Eng qattiq kristallar, yulduzlarning to‘dalanib to‘planishi, u yoki bu o‘simliklar, hayvonlar, insonlar go‘yo Yo‘qlikdan kelib chiqqandek bo‘ladi, (ular xuddi shunday tarzda hech qachon bo‘lmagan), borliqqa aylanadi. Narsalarning borlig‘i qanchalik uzoq vaqt davom etmasin, nihoyasiga yetadi va konkret sifat tarzi (deylik, shaxsan shu inson)da Yo‘qlikka ketadi.
Borliq va Yo‘qlik muammosi shu qadar hayotiyki, u hozirgi kunda ham dolzarb bo‘lib turibdi. Insoniyatning yashab qolishini ta’minlash, borlig‘ini ta’minlash, termo-yadro urushining Yo‘qlik sari dahshatli qadam qo‘yishining oldini olish hamma vaqt muhim masaladir.
Olam borlig‘i vaqt ichida abadiymi - o‘tkinchimi? Fazoda-chi? Makonda cheklanganmi yoki cheklanmaganmi? Hayot va mamot masalasi-chi? Bu savollar borliq kategoriyasini ilmiy o‘rganishni kun tartibiga qo‘yadi. Yaxlit olam borlig‘i bilan odam borlig‘ini qiyoslasak, inson hayoti bu jarayonda kapalak umriga qiyos etgulik. (G‘.G‘ulom) Hayot shu qadar tez o‘tadiki, konkret odamning hayoti juda qisqa ekanligiga ishonch hosil qilish mumkin.
Borliqning falsafiy ma’nosini chuqurroq tasavvur etish uchun uning konkret shakllarini ko‘rib chiqish lozim bo‘ladi.
Falsafiy adabiyotlarda borliqning quyidagi shakllari mavjudligi e’tirof etiladi:
Do'stlaringiz bilan baham: |
