Ўзджтсу 65 ёшда! Спорт ўйинлари факультети

МИЛЛИЙ СПОРТ ТУРЛАРИ, ЎЙИНЛАРИ НАЗАРИЯСИ ВА УСЛУБИЯТИ КАФЕДРАСИ
Миллий спорт турлари, ўйинлари назарияси ва услубияти кафедраси, 2018 йил ташкил этилган. Айни пайтда кафедрага доцент Шавкат Мирзақулов раҳбарлик қилади. Кафедрада бугун бир нафар профессор, тўртта доцент, тўртта педагогика фанлари бўйича фалсафа докторлари, иккита катта ўқитувчи ва еттита ўқитувчилар 300дан зиёд талабаларга мутахассислик бўйича дарс беришади. 2018 йилдан буён кафедрада икки юз нафардан ортиқ кураш ва белбоғли кураш йўналишлари бўйича тренер –кадрлар тайёрланган.
Кафедра Ўзбекистон белбоғли кураш федерацияси, Ўзбекистон кураш федерацияси, олий спорт маҳорати мактаблари, шунингдек, Венгрия белбоғли кураш федерацияси, Жанубий Корея кураш федерацияси билан ҳамкорликда иш олиб бормоқда. Жанубий кореялик кураш бўйича мутахассис Ким Ир Жун кафедра ўқитувчиси саналади.
Талабаларнинг мусобақалардаги иштирокини ҳам юқори баҳолаш мумкин. Руслан Бўриев, Эркин Қозоқов, Умар Бозоров, Ўрол Содиқов, Гавҳар Худойқуловалар Осиё ўйинлари ғолиби саналади.Белбоғли кураш бўйича Шахзод Абдураҳмонов, Анварбек Раҳимов, Нодир Аҳатжонов, Мардон Кимсанов, Обидали Мавлонов, Гавҳарой Маҳмудова, Дилафрўз Мамажонова каби бир қанча талабалар миллий терма жамоа сафида халқаро турнирлар, жаҳон чемпионатлари, ёпиқ иншоотлардаги Осиё ўйинларида иштирок этиб, ғолиб спортчилар қаторидан жой олишга муваффақ бўлишмоқда.
Талабаларнинг мазкур натижаларни қайд этишида кураш бўйича Миржалол Шукуров, Шуҳрат Келдиёров, Бахтиёр Холиқов, белбоғли кураш бўйича Дониёр Аҳмаджонов, Зайлобиддин Ортиқов, Маъруфжон Қирғизбоев каби малакали тренер – ўқитувчилар меҳнатининг самараси дейиш мумкин.
Шавкат МИРЗАҚУЛОВ, миллий спорт турлари, ўйинлари назарияси ва услубияти кафедраси мудири: - Университетимизда таълим сифатини ошириш, талабаларнинг пухта билим олишлари ва малакали кадрларни тайёрлаш бўйича кенг қамровли ишлар амалга оширилмоқда. Жумладан, алоҳида кураш маркази барпо этилиб, энг сўнгги русмдаги жиҳозлар билан таъмингланган ҳолда талабаларимиз ихтиёрига топширилди. Янги ўқув йилидан бошлаб ушбу мажмуада иш бошлаймиз. Беш ташаббус доирасида шунингдек, яқин атрофда истиқомат қилаётган оилалар фарзандларини бўш вақтларини мазмунли ўтказишлари учун кураш ва белбоғли кураш бўйича кичик ёшдаги болалар учун гуруҳлар ҳам ташкил этилган. Бир сўз билан айтганда, Чирчиқ шаҳрининг энг сўлим гўшаси жойлашаган олий ўқув юртимизда талабаларнинг танлаган мутахассисликлари бўйича билим олиб, малакали кадрлар бўлиб етишишлари учун барча шароитлар муҳайё этилмоқда.