Ózbekstan respublikasi joqari hám orta arnawli bilimlendiriw ministirligi ajiniyoz atindaǵi nókis mámleket pedagogika instituti

ÓZBEKSTAN RESPUBLIKASI JOQARI HÁM ORTA ARNAWLI BILIMLENDIRIW MINISTIRLIGI
AJINIYOZ ATINDAǴI NÓKIS MÁMLEKET

PEDAGOGIKA INSTITUTI



2021-2022 OQIW JILI USHIN JASLAR MENEN ISLEW, RUWXIY -AǴARTÍWSHILIQ HÁM TÁRBIYALIQ JÓNELISTE ÁMELGE
ASIRILATUǴIN ILAJLAR ESABATÍ

Studentlerimizdiń joqarı nátiyjelerge erisiwine tiykar jaratqan trener-oqıtıwshılarǵa itibar

Xabar bergenimizdey, usı jıldıń 3-8-noyabr kúnleri aralıǵında Tashkent qalasında Ózbekstan Milliy universiteti stadionında Ózbekstan Respublikası studentler sport associaciyası tárepinen sporttıń regbi-7 túri boyınsha joqarı oqıw orınları studentleri arasında «Studentler ligası» jarısı ótkerildi. Usı jarısta instituttıń qızlar saylandı komandası barlıq qarsılas komandalardı jeńip shıǵıp, 1-orındı, al instituttıń erkekler saylandı komandası bolsa sıylı 3-orındı qolǵa kirgizgen edi. NMPI dene mádeniyatı fakulteti jámááti jarısqa studentlerdi joqarı dárejede tayarlaǵan hám usınday nátiyjelerge erisiwine tiykar jaratqan trener-oqıtıwshılardı qutlıqlap, aldaǵı jumıslarına tabıslar tiledi.

Dene mádeniyatı fakulteti jámááti hám student jasları «áhmiyetli 40 kúnlik» ilajlarında

NMPI dene mádeniyatı fakulteti jámááti hám student jasları «áhmiyetli 40 kúnlik» sheńberinde fakultet imaratı átirapında dekorativ hám sayamanlı terek nállerin otırǵızıw sıyaqlı jumıslardı ámelge asırdı. Esletip ótemiz, Prezidentimiz Shavkat Mirziyoev basshılıǵında ótkerilgen májiliste mámleketimiz boylap «Jasıl mákan» ulıwma milliy joybarın ámelge asırıw ilajları kórip shıǵılıp, usı jıldıń 10-dekabr kúnine shekem terek egiw boyınsha «áhmiyetli 40 kúnlik» járiyalanǵan edi.

Kásiplik awqamları kúnine arnalǵan sport jarısları ótkerildi

11-noyabr – Kásiplik awqamları kúni bayramı múnásibeti menen usı jıldıń 9-10-noyabr kúnleri Ájiniyaz atındaǵı Nókis mámleketlik pedagogikalıq institutında «Jańa Ózbekstan – jańa kásiplik awqamı» atamasında institutta jumıs islep atırǵan professor-oqıtıwshılar hám xızmetkerler arasında sporttıń mini futbol túri boyınsha Kásiplik awqamı kubogı jarısı bolıp ótti. Jarıs juwmaǵında 1-orındı tariyx fakulteti komandası iyelegen bolsa, 2-orın dene mádeniyatı fakulteti, al sıylı 3-orın rektorat komandalarına nesip etti. Sonıń menen birge, bayram múnásibeti menen student jaslar arasında sporttıń shaxmat túri boyınsha jarıs shólkemlestirildi. Jarıs juwmaǵında jeńimpazlar hám barlıq qatnasıwshılarǵa kásiplik awqamı komiteti tárepinen estelik sawǵaları, húrmet jarlıqları tapsırıldı.

Gaz iyisinen záhárleniwdiń aldın alıw boyınsha profilaktikalıq ilajlar alıp barılmaqta

NMPI dene mádeniyatı fakultetinde student jaslardıń gaz iyisinen záhárleniwiniń aldın alıw boyınsha profilaktikalıq ushırasıw ótkerildi. Ushırasıwda Nókis qalalıq Ayrıqsha jaǵdaylar bólimi baslıǵınıń orınbasarı K.Ámetov bul boyınsha túsinik jumısların alıp bardı. Sonday-aq, súwretlew óneri hám texnologiyalıq tálim fakulteti studentleri arasında hár bir topar kesiminde usı baǵdardaǵı ushırasıwlar ótkerilip, studentlerge gaz iyisinen záhárleniwdiń aldın alıw temasına arnalǵan videorolik qoyıp berildi. Ijarada jasaytuǵın studentlerdiń úylerinde de bul boyınsha tiyisli taraw qánigeleri menen úyreniw jumısları alıp barılıp, túsindiriw jumısları ótkerilmekte.

Studentlerge gaz iyisinen záhárleniwdiń aldın alıw boyınsha túsinik jumısları dawam etpekte

NMPI shet tilleri fakultetinde Nókis qalalıq Ayrıqsha jaǵdaylar bólimi inspektorları D.Reypov hám Q.Seytnazarovlar qatnasıwında ótkerilgen ushırasıwda jılıtıw morılarınıń tıǵılıwı hám jaramsızlıǵı, tam bastırmasınıń nadurıs shıǵarılǵanlıǵı, kóp waqıttan berli paydalanılmaǵan jılıtıw qazanı morıların tazalatpay paydalanıw, gaz gorelkalarınıń nasazlıǵı yamasa talapqa juwap bermewi, gaz úskenelerin rezina shlanglar járdeminde jalǵaw sıyaqlı jaǵdaylarda gaz iyisinen záhárleniw jaǵdayları baqlanıwı atap ótildi.Dene mádeniyatı fakulteti tyutorları hám Nókis qalalıq Ayrıqsha jaǵdaylar bólimi inspektorları J.Pirjanov hám T.Qudaybergenovlar tárepinen ijarada jasaytuǵın studentlerdiń jaǵdayları, jılıtıw úskenelerinen paydalanıwdaǵı texnikalıq qáwipsizlik jaǵdayları úyrenildi.

Voleybol boyınsha institut birinshiligi bolıp ótti

Institutta barlıq fakultetlerdegi er studentler arasında sporttıń voleybol túri boyınsha institut birinshiligi jarısı ótkerildi. Komandalıq túrde ótkerilgen jarısta dene mádeniyatı fakulteti komandası 1-orındı iyeledi. 2-orın fizika-matematika, 3-orın bolsa baslawısh tálim fakultetleri komandalarına nesip etti. Jeńimpazlar hám sıylı orın iyeleri instituttıń sport klubı tárepinen diplom jáne medallar menen sıylıqlandı.

Student qızlar arasında institut birinshiligi ótkerildi

Institutta barlıq fakultetlerdegi student qızlar arasında sporttıń voleybol túri boyınsha institut birinshiligi jarısı ótkerildi. Komandalıq túrde ótkerilgen jarısta dene mádeniyatı fakulteti komandası 1-orındı iyeledi. 2-orın túrkiy tiller, 3-orın bolsa pedagogika fakultetleri komandalarına nesip etti. Jeńimpazlar hám sıylı orın iyeleri instituttıń sport klubı tárepinen diplom jáne medallar menen sıylıqlandı.

NMPI studenti konferenciyada belsene qatnasqanı ushın sertifikat penen sıylıqlandı

Tashkent qalası hákimligi, Jaslar isleri agentligi Tashkent qalalıq basqarması, Ózbekstan jaslar awqamı Tashkent qalalıq aymaqlıq Keńesi hám Ózbekstan Milliy universiteti menen birgelikte «Ózbekstan Respublikası Konstituciyası – mámleket rawajlanıwı hám jámiyet abadanlıǵınıń huqıqıy kepilligi» atamasındaǵı respublikalıq ilimiy-ámeliy konferenciyasın ótkerildi. Konferenciyada instituttıń dene mádeniyatı fakulteti 4-kurs studenti D.Qurbanova belsene qatnasıp, sertifikat penen sıylıqlandı.

Biz diniy ekstremizm, terrorizm hám jınayatshılıqqa qarsımız

Ájiniyaz atındaǵı NMPI baslawısh tálim hám dene mádeniyatı fakultetleri student-jaslarına diniy ekstremizm hám terrorizmge qarsı gúresiw, jaslar arasında jınayatshılıqtıń aldın alıw boyınsha qánigeler menen birgelikte ilaj ótkerildi. Ilaj dawamında diniy ekstremizm hám terrorizm global xarakterge iye bolıp, dúnyanıń barlıq mámleketleri hám regionlarına birdey qáwip salıp atırǵanlıǵı sebepli onıń aldın alıw, oǵan qarsı gúresiw boyınsha keń túrde túsinikler berildi hám student-jaslar ózlerin qızıqtırǵan sorawlarına juwaplar aldı. Ilajǵa Al-Beruniy atındaǵı Islam bilim jurtı ruwxıylıq isleri boyınsha orınbasarı Adilbay Erejepov hám Qaraqalpaqstan Respublikası Ishki isler ministrligi Nókis qalalıq 47-sanlı «Qumbız awıl» MPJ profilaktikalıq inspektorı Babur Joldasovlar qatnastı.

NMPI Dene mádeniyatı fakultetinde usı bayram sánesine arnalǵan ádebiy keshe shólkemlestirilip, onda ana tilimiz haqqındaǵı qosıqlar, shıǵarmalardan úzindiler oqılıp, saxnalıq kórinisler atqarıldı.

Dene mádeniyatı fakultetinde hayal-qızlar arasında jınayatshılıqtıń aldın alıw boyınsha ushırasıw bolıp ótti. Ushırasıwǵa Nókis qalasındaǵı Imam Iyshan Muhammed jámáátlik meshiti imam orınbasarı K.Turdımuratov, «Kók ózek» MPJ profilaktikalıq inspektorı A.Ásenbaev hám MPJ baslıǵınıń orınbasarı A.Qálimbetova qatnastı.

Dene mádeniyatı fakulteti student jasları «áhmiyetli 40 kúnlik» ilajlarında

NMPI dene mádeniyatı fakulteti jámááti hám student jasları «áhmiyetli 40 kúnlik» sheńberinde fakultet imaratı átirapında dekorativ hám sayamanlı terek nállerin otırǵızıw sıyaqlı jumıslardı ámelge asırdı.

Kásiplik awqamları kúnine arnalǵan sport jarısları ótkerildi

11-noyabr – Kásiplik awqamları kúni bayramı múnásibeti menen usı jıldıń 9-10-noyabr kúnleri Ájiniyaz atındaǵı Nókis mámleketlik pedagogikalıq institutında «Jańa Ózbekstan – jańa kásiplik awqamı» atamasında institutta jumıs islep atırǵan professor-oqıtıwshılar hám xızmetkerler arasında sporttıń mini futbol túri boyınsha Kásiplik awqamı kubogı jarısı bolıp ótti. Jarıs juwmaǵında 1-orındı tariyx fakulteti komandası iyelegen bolsa, 2-orın dene mádeniyatı fakulteti, al sıylı 3-orın rektorat komandalarına nesip etti. Sonıń menen birge, bayram múnásibeti menen student jaslar arasında sporttıń shaxmat túri boyınsha jarıs shólkemlestirildi. Jarıs juwmaǵında jeńimpazlar hám barlıq qatnasıwshılarǵa kásiplik awqamı komiteti tárepinen estelik sawǵaları, húrmet jarlıqları tapsırıldı.

Taraw qánigeleri menen ushırasıw ótkerildi

NMPI dene mádeniyatı fakultetinde jaslar arasında jınayatshılıq hám huqıqbuzarlıqlardıń aldın alıw, náshebentlik jáne AIJSke qarsı gúresiw boyınsha úgit-násiyat jáne túsinik jumısların alıp barıw maqsetinde tiyisli taraw xızmetkerleri menen ushırasıw bolıp ótti. Ushırasıwda Nókis qalalıq 4-sanlı ishki isler bólimshesi baslıǵınıń orınbasarı, mayor B.Matnazarov hám Respublikalıq AIJSke qarsı gúresiw orayınıń shıpakeri B.Qlıchevalar tárepinen joqarıda atap ótilgen illetlerdiń aqıbetleri, jámiyetke, jaslardıń keleshegine qáwpi boyınsha túsinik jumısları alıp barıldı.

Dene mádeniyatı fakultetinde áhmiyetli siyasiy process – Prezident saylawına arnalǵan seminar ótkerildi NMPI dene mádeniyatı fakultetinde 24-oktyabr kúni bolıp ótetuǵın Ózbekstan Respublikası Prezidenti saylawı múnásibeti menen jaslardıń huqıqıy bilimlerin arttırıw maqsetinde seminar shólkemlestirildi.Seminarda fakultet professor-oqıtıwshıları tárepinen Prezidentlikke talabanlardıń saylaw aldı baǵdarlamaları haqqında túsinikler berildi hám tanıstırıldı. Studentlerdiń sorawlarına juwaplar berildi. Sonday-aq, instituttıń málimleme-resurs orayı qánigeleri qatnasıwında studentler arasında saylaw procesindegi jańalıqlar, saylawda jaslardıń tutqan ornı, saylawdıń mámleketimiz keleshegindegi áhmiyeti haqqında pikir almasıwlar bolıp ótti.

1-kursqa qabıl etilgen studentler ushın kredit-modul sisteması haqqında seminar ótkerildi. Instituttıń dene mádeniyatı fakultetinde 2021-2022-oqıw jılında 1-kursqa qabıl etilgen studentler ushın kredit-modul sistemasınıń ózgeshelikleri, abzallıqları hám imkaniyatları haqqında seminar ótkerildi.