Ўзбекистон ресубликаси олий ва ўрта махсус таълим вазирлиги

7. Ўқув натижаларини баҳолаш - талабалар томонидан ўқув материаллари ўзлаштирилганлигини, кўникма ва малакалар ҳосил бўлганлигини текшириш ҳамда баҳолаш таълим жараёнининг зарурий таркибий қисми ҳисобланади. Бу фақат ўқитиш натижаларини баҳолаш эмас, балки ўқитиш жараёни даврида талабалар билим олиш ва мустақил иш фаолиятига раҳбарлик қилиш ҳамдир.
Билим ва кўникмаларни текшириш ҳамда баҳолашнинг таълимий аҳамияти шундан иборатки, бунда ўқув материалининг ўзлаштирилиши тўғрисида талаба ва ўқитувчи муайян маълумотга эга бўлади. Ўқитувчига талабаларнинг қайси ўқув материалини яхши ўзлаштирилгану, қайси иш етарли даражада ўзлаштирилмаганлиги маълум бўлади. Бу эса талабанинг ўрганиш фаолиятини ташкил этиш ва бошқариш учун асос бўлиб ҳисобланади. Баҳолаш орқали талабаларнинг ўқув материалларини билиш, тушуниш, хотирада сақлаб қолиш, амалда қўллай олиш, таҳлил қилиш ва ўз-ўзини баҳолаш даражалари аниқланади.
Билимларни, кўникма ва малакаларни баҳолашнинг тарбиявий аҳамияти шундаки, бунда талабаларнинг ўқишга қизиқиши, ўз ютуқлари ёки муваффақиятсизликларига нисбатан муносабати шаклланади, ўқув қийинчиликларни енгиш иштиёқи туғилади.
Натижаларни баҳолаш орқали бутун таълим жараёни текширилиб кўрилиши керак. Бу билан таълим жараёнида кутилаётган ўқув мақсадига эришилаётганлик даражаси текширилади. Таълим бериш давомидаги талабаларнинг билим, кўникма ва малакаларни баҳолаш талабанинг ўзлигини англаши учун бир имкониятдир.
Юқорида келтирилган фикрлардан келиб чиқиб, талабаларни баҳолашда қуйидагиларни эътиборга олиш муҳимдир:

• 
  ўқув мақсадларига эришилганликни аниқлаш;
  
• 
  таълим жараёнидаги ютуқ ва камчиликларни аниқлаш;
  
• 
  ўқитувчи ўз фаолиятидаги камчиликларни бартараф этиш;
  
• 
  жорий ва оралиқ ўзлаштириш даражасини аниқлаш;
  
• 
  баҳолаш натижалари бўйича ота-оналарга маълумот бериш;
  
• 
  дастлабки билим ва кўникмалар таълим натижасини баҳолаш;
  
• 
  талабаларнинг қизиқишларини аниқлаш.