Ўзбекистон республикасининг қонуни

60-модда. Давлат фуқаролик хизматини тугатилиши устидан шикоят қилиш
Давлат фуқаролик хизматини тугатиш ҳақидаги маъмурий ҳужжат устидан юқори турувчи давлат органи ва ташкилотига ёки давлат хизмати масалалари бўйича ваколатли органга ёхуд судга шикоят қилиниши мумкин.
 
61-модда. Давлат фуқаролик хизматини ноқонуний тугатилишининг оқибатлари
Давлат фуқаролик хизматини ноқонуний тугатилиши аниқланганда, тегишли ноқонуний маъмурий хужжат бекор қилиниб, давлат фуқаролик хизматчиси давлат фуқаролик хизматчиси ҳуқуқий мақомига тикланиши лозим.
Давлат фуқаролик хизматчиси ҳуқуқий мақомига тикланган давлат фуқаролик хизматчисига, Ўзбекистон Республикаси Давлат бюджети маблағлари ҳисобидан давлат фуқаролик хизматининг ноқонуний тугатилиши билан боғлиқ бўлган зарар қопланади.
Давлат фуқаролик хизматининг ноқонуний тугатилишида айбдор раҳбар, интизомий ёки қонун билан белгиланган бошқа жавобгарликка тортилиши мумкин. Давлат фуқаролик хизматининг ноқонуний тугатилиши билан боғлиқ зарар, агар қонун ҳужжатларида ўзгача ҳол белгиланмаган бўлса, айбдор раҳбардан тўланган товон миқдорида регресс тартибида ундирилиши мумкин.
 
10-боб. Давлат фуқаролик хизматчисининг жавобгарликка тортишнинг ўзига хос хусусиятлари
 
62-модда. Давлат фуқаролик хизматчиларини жавобгарликка тортишнинг асослари
Давлат фуқаролик хизматчиси томонидан интизомий хатти-ҳаракат, маъмурий ҳуқуқбузарлик, жиноят содир этилиши ёки меҳнат шартномаси билан боғланган давлат органи ва ташкилотига зарар етказилиши уни жавобгарликка тортишга асос бўлади.
 
63-модда. Давлат фуқаролик хизматчиларининг интизомий жавобгарлиги
Давлат фуқаролик хизматчисининг интизомий ножўя хатти-ҳаракати –давлат фуқаролик хизматчиси томонидан унга юкланган хизмат мажбуриятларини қонунга ҳилоф, айбли ҳаракатсизлик ёхуд тегишли равишда бажармаслик, кўп миқдорда зарар етказилиши ёки бошқача оғир оқибатларга сабаб бўлмаган мансаб ваколатларини суиистеъмол қилиш, хизмат интизоми ва хизмат одоб-ахлоқ қоидаларини, худди шунингдек давлат фуқаролик хизматида бўлиш билан боғлиқ бўлган ушбу Қонун билан ўрнатилган чекловларни бузиш ҳисобланади.
Интизомий ножўя хатти-ҳаракатларни содир этганлик учун давлат фуқаролик хизматчисига қуйидаги интизомий чоралар қўлланилиши мумкин:
ҳайфсан;
хизматга тўлиқ муносиб эмаслиги тўғрисида эълон қилиш;
малака мартабасини пасайтириш;
давлат лавозимида пасайтириш
эгаллаб турган давлат лавозомидан озод қилиш ва Миллий кадрлар резервидан чиқариш.
Бошқа турдаги интизомий жазо қўлланилишига йўл қўйилмайди.