Ўзбекистон Республикасининг Қонуни геодезия ва картография фаолияти тўҒрисида

6-модда. Геодезия ва картографияга доир материалларнинг (маълумотларнинг) тўлиқлиги, ишончлилиги ҳамда долзарблиги
Геодезия ва картографияга доир материалларнинг (маълумотларнинг) тўлиқлиги, ишончлилиги ҳамда долзарблиги давлат геодезия, нивелир ва гравиметрия тармоқларини, геодезик зичлаштириш тармоқларини ишлаш ҳолатида сақлаб туриш, давлат топографик хариталари ва режаларини картографик мониторинг қилиш ҳамда узлуксиз равишда янгилаб бориш тизимини жорий этиш йўли билан таъминланади.
7-модда. Геодезия ва картографияга оид ишларни бажаришда ўлчовларнинг бирлиги
Геодезия ва картографияга оид ишларни бажаришда ўлчовларнинг бирлигига геодезия ва картографияга доир материалларни (маълумотларни) метрологик жиҳатдан таъминлаш ҳамда стандартлаштириш, сертификатлаштириш, шунингдек метрология назоратини ўтказиш орқали эришилади.
8-модда. Хариталар ва режаларни яратиш ҳамда янгилашда бирхиллаштирилган шартли белгиларни қўллаш ва географик объектларнинг номларидан бир хилда фойдаланиш
Хариталар ва режаларни яратиш ҳамда янгилашда геофазовий объектларни ва уларнинг тавсифларини акс эттириш учун бирхиллаштирилган шартли белгилар, шунингдек Географик объектлар номларининг давлат реестрида рўйхатга олиниши лозим бўлган ёки рўйхатга олинган географик объектларнинг меъёрлаштирилган номлари қўлланилади.
9-модда. Геодезия ва картография фаолиятининг объектлари
Ўзбекистон Республикаси ҳудуди, ер шари ҳудуди, космик фазо, шу жумладан табиий ҳамда сунъий осмон жисмлари геодезия ва картография фаолиятининг объектларидир.
10-модда. Геодезия ва картография фаолиятининг субъектлари
Геодезия ва картография фаолиятининг субъектлари қуйидагилардан иборат:
Ўзбекистон Республикаси Вазирлар Маҳкамаси;
Ўзбекистон Республикаси Ер ресурслари, геодезия, картография ва давлат кадастри давлат қўмитаси;
Ўзбекистон Республикаси Мудофаа вазирлиги;
давлат ва хўжалик бошқаруви органлари;
маҳаллий давлат ҳокимияти органлари;
геодезия ва картография фаолиятини амалга ошириш ҳуқуқига доир лицензияга эга бўлган юридик шахслар;
геодезия ва картографияга доир материалларни (маълумотларни) сақловчи юридик ва жисмоний шахслар.