Ўзбекистон республикаси президентининг фармони

ЎЗБЕКИСТОН РЕСПУБЛИКАСИ
ПРЕЗИДЕНТИНИНГ
ФАРМОНИ
28.07.2010 й.
N ПФ-4232
Ҳужжатнинг рус тилидаги
матнига қаранг
ТАЪЛИМ МУАССАСАЛАРИНИНГ
БИТИРУВЧИЛАРИНИ ТАДБИРКОРЛИК
ФАОЛИЯТИГА ЖАЛБ ЭТИШ БОРАСИДАГИ
ҚЎШИМЧА ЧОРА ТАДБИРЛАР ТЎҒРИСИДА

Мазкур Фармонга ЎзР Президентининг 09.12.2014 й. ПФ-4677-сон Фармонига мувофиқ ўзгартиришлар киритилган

"Баркамол авлод йили" Давлат дастурига мувофиқ ҳамда кичик бизнес ва хусусий тадбиркорликни ривожлантиришни янада рағбатлантириш, ёшларни, авваламбор касб-ҳунар коллежлари, академик лицейлар ва олий таълим муассасалари битирувчиларини тадбиркорлик фаолиятига кенг жалб этиш учун қулай шарт-шароитлар яратиш мақсадида:

1. Белгилансинки, микрофирмалар ва кичик корхоналар томонидан республиканинг касб-ҳунар коллежлари, академик лицейлари ва олий таълим муассасалари битирувчилари билан меҳнат шартномалари тузилганда, банд ходимларнинг ўртача йиллик сони қонун ҳужжатларида белгиланган чекланган нормативдан кўпи билан 50 фоиз оширилган ҳолларда, микрофирмалар ва кичик корхоналар учун назарда тутилган имтиёзлар, кафолатлар ва ҳуқуқлар уларда сақланиб қолади. (ЎзР Президентининг 09.12.2014 й. ПФ-4677-сон Фармони таҳриридаги хатбоши)

Бунда ходимлар сонининг оширилишига Ўзбекистон Республикаси касб-ҳунар коллежлари, академик лицейлари ва олий таълим муассасалари битирувчиларининг ўқишни якунлаган кунидан бошлаб 3 йилдан ортиқ вақт ўтмаган тақдирдагина йўл қўйилади.

2. Ўзбекистон Республикаси Молия вазирлиги Иқтисодиёт вазирлиги, Адлия вазирлиги, Давлат солиқ қўмитаси ҳамда бошқа манфаатдор вазирликлар ва идоралар билан биргаликда бир ой муддатда қонун ҳужжатларига мазкур Фармондан келиб чиқадиган ўзгартиш ва қўшимчалар тўғрисида Вазирлар Маҳкамасига таклифлар киритсин.

Қаранг: ЎзР 13.12.2010 й. "Тадбиркорлик фаолияти эркинлигининг кафолатлари тўғрисида"ги Ўзбекистон Республикаси Қонунининг 5-моддасига ўзгартиш киритиш ҳақида”ги ЎРҚ-265-сон Қонуни*

3. Ушбу Фармоннинг ижросини назорат қилиш Ўзбекистон Республикасининг Бош вазири Ш.М. Мирзиёев зиммасига юклансин.

Ўзбекистон Республикаси Президенти И. Каримов
“Халқ сўзи”, 2010 йил 29 июль

"Ўзбекистон Республикаси қонун ҳужжатлари тўплами", 2010 йил, 30-сон, 251-модда

"Ўзбекистон Республикаси Олий Мажлиси палаталарининг Ахборотномаси", 2010 йил, 7-сон, 294-модда