Ўзбекистон республикаси президенти ҳузуридаги давлат бошқаруви академияси янги ўзбекистон – янгича дунёқараш

Ташқи сиёсатдаги устувор шериклар. Кўриниб турганидек, Марказий Осиё давлатларидан кейин биринчи тилга олинган давлат сифатида Россия келтирилмоқда. Хитой эса, иккинчи, ундан кейин АҚШ, Туркия ва ҳоказо давлатлар кетма-кетлиги келтирилади. Хорижий ҳамкорларга бундай устуворлик берилиши халқаро шерикликда Ўзбекистон изчил сиёсатини давом эттиришини ифода этади.
Маълумки, Ўзбекистон 2020 йилда МДҲда ўз раислигини якунлади. Бу даврда Ўзбекистон билан МДҲ давлатлари ўртасида, айниқса, Россия Федерацияси билан ҳамкорлик янги босқичга кўтарилди. Жумладан, саноат кооперацияси 2020 йилда ўз мевасини беришни бошлади. Жумладан, Россия Федерацияси билан ҳамкорликда рух ва полимер қопламали металл листлар ишлаб чиқарадиган Тошкент металлургия заводи ишга туширилди. Лойиҳанинг умумий қиймати 420 млн.долларни ташкил этиб, йилига 750 минг тоннагача металл ишлаб чиқариш имкониятига эга. Лойиҳага киритилган жами сармоялар 326,6 млн. еврони ташкил этиб, шундан 226 млн. евро — Россия экспорт-импорт банки кредити, 147 млн. евро — ўз маблағлари, 15,1 млн евро — «Асака» банки кредити ҳисобланади²⁶. Лойиҳанинг ўзини қоплаш муддати тахминан – 8,6 йил.
2021-2024 йилларда саноат кооперациясининг янада кучайиши кутилмоқда. Бу соҳада, айниқса, Ўзбекистоннинг саноати акциялари биржада сотилиши, соҳанинг модернизация қилинишига хизмат қилади.
2021 йилда Тошкентда “Ҳамдўстлик мамлакатлари маданий мероси” конференциясини ўтказиш ҳам режалаштирилган. Ушбу ташаббус БМТ Бош Ассамблеясининг 75-сессиясида БМТ доирасида илгари сурилган – 2021 йилда Хива шаҳрида ЮНЕСКО билан ҳамкорликда “Марказий Осиё жаҳон цивилизациялари чорраҳасида” халқаро форумини ўтказиш тўғрисидаги яна бир ташаббусини мукаммал тарзда тўлдиради. Иккала ташаббус ҳам халқаро миқёсда Ўзбекистоннинг маданий алоқаларини мустаҳкамлашга ҳисса қўшади.
Ўзбекистон сўнгги йилларда кўпгина соҳаларда халқаро рейтингини мустаҳкамлади. Жумладан, бизнесни рўйхатдан ўтказишда 190 та давлат орасида 8-ўрин, энг яхши ислоҳотчи мамлакатлар сафига кирди. «Бизнес юритиш» рейтингида мамлакат 7 та позицияга кўтарилди. 10 йил ичида мамлакатнинг Иқтисодий ҳамкорлик ва ривожланиш ташкилотининг кредит хавфи рейтингидаги позицияси яхшиланди.