Ўзбекистон республикаси олий ва ўрта махсус таълим вазирлиги ўзбекистон республикаси транспорт вазирлиги тошкент давлат транспорт университети

III. ҚЎЛЁЗМАНИ НАШРГА ТАЙЁРЛАШ,
УНИ РАСМИЙЛАШТИРИШГА ҚЎЙИЛАДИГАН ТАЛАБЛАР ВА МУАЛЛИФ БИЛАН МУНОСАБАТЛАР

3.1. Қўлёзмаларнинг муаллифлик ва кафедра даражасидаги тайёрланиш муддатлари университет Илмий-услубий кенгаши ва кафедранинг йиллик иш режалари асосида белгиланади.

3.2. Муаллиф қўлёзмани ўқув жараёни талабларига ва кафедранинг тавсияларига тўлиқ мос равишда сифатли ва ўз вақтида тайёрлаб, кафедра мудирига топшириши шарт.
3.3. Кафедра мудири қўлёзма ҳажмини ҳисобга олган ҳолда, уни қабул қилган кундан бошлаб, бир ой ичида ушбу қўлёзмани кафедра йиғилишида муҳокама қилишни ташкил этади. Бунинг учун қўлёзмани камида иккита тақризчига юборади. Қўлёзма кафедралараро жамоа томонидан тайёрланаётганда, муаллифлик жамоаси раҳбари уни манфаатдор кафедраларнинг қўшма йиғилишида муҳокама қилишни ташкил қилади.
3.4. Тақризда қўлёзма илмий даражасининг ҳар томонлама ва объектив баҳоси кўрсатилади. Шунингдек, тақризчи ўқув адабиётининг услубий афзалликлари ва камчиликларини малакали таҳлил қилиши, қўлёзма сифатини ошириш учун муаллифга асосли таклифларни бериши лозим.
3.5. Тақриз хулосаси ижобий бўлган қўлёзма кафедра муҳокамасига тақдим этилади.
3.6. Қўлёзмани кафедрада муҳокама қилиш жараёнида баённома юритилади, унда муҳокамада билдирилган барча мулоҳазалар, шунингдек муаллифнинг ушбу мулоҳазаларга нисбатан билдирган фикр ва эътирозлари қайд этилади.
3.7. Агар қўлёзмада камчиликлар бўлса, уларни бартараф этиш учун муаллифга қайтариш тўғрисида қарор қабул қилади. Қарорда шунингдек қуйидагилар кўрсатилади: қўлёзманинг дастурга, ўқув режасига, мавзуга, ҳажми бўйича талабларга мувофиқлиги; асосий илмий натижалар ва таклифлар, уларни ўқув жараёнида қўллаш ва амалиётга татбиқ этиш шакллари; қўлёзмада мавжуд бўлган маълумотларнинг ўзаро мослиги.
3.8. Муаллиф кафедра йиғилишининг тавсияларига мувофиқ қўлёзма камчиликларини бартараф этади ва тўлдириш ва қўшимчаларнинг ўзига хос хусусиятлари ва ҳажмини, шунингдек, алоҳида танқидий мулоҳазаларга нисбатан асосли эътирозларини акс этувчи маълумотнома билан кафедра мудирига тақдим этади.
Кафедра томонидан масъул муҳаррирни тайинлаш тўғрисида таклиф киритилиши мумкин. Уни тайинлаш тўғрисидаги қарор ўқув ишлар бўйича проректор томонидан қабул қилинади. Масъул муҳаррир қўлёзманинг нашрга юборилган якуний нусхасини тасдиқлайди.
3.9. Кафедра мудири муаллиф томонидан кафедра аъзолари ва тақризчилар берган мулоҳазалар ҳисобга олганлигига тўлиқ ишонч ҳосил қилгандан сўнг қўлёзмани университет Илмий-услубий кенгаши муҳокамасига тақдим этади.
Кафедра мудири ва тақризчилар муаллиф билан бир қаторга нашрга тавсия этилган ишларнинг илмий мазмуни ва услубий даражаси учун жавобгардир.
3.10. Йиллик нашр режаси университет Кенгаши аъзолари томонидан муҳокама этилиб ректор томонидан тасдиқлангандан сўнг қўлёзмалар ўрнатилган тартибда университет Илмий-услубий кенгаши муҳокамасига тақдим этилади. Илмий-услубий кенгаш қарори билан чоп этишга тавсия этилган қўлёзмалар Таҳририй нашриёт ва полиграфия бўлимига топширилади.