Ўзбекистон республикаси олий ва ўрта махсус таълим вазирлиги тошкент давлат аграр университети магистратура бўлими

КО-16-2,5-кесма. “Олмалиқ кон металлургия комбинати” АЖ атрофидан ғарбий йўналиш томон 2,5 км нуқтада қазилган. Ҳудудда суғориладиган тўқ тусли бўз тупроқлар тарқалган бўлиб, маккажўхори экилган, атрофда тут, арча, жийда дарахтлари мавжуд, ернинг устида тошлар кўп учрайди, ифлословчи манбадан чиқаётган чиқинди ёки кул элементлари кўзга ташланмайди.
0-5 см. Оч тусли рангли, кучсиз намланган, ўрта қумоқли, майда кесакчали, кучли зичлашган, ўсимлик илдизлари ва ҳашаротлар инлари ҳамда тошлар кўп учрайди, ифлословчи моддалар кўзга кўринмайди, зичлиги билан кейинги қатламга ўтади.
5-20 см. Оч тусли рангли, кучсиз намланган, ўрта қумоқли, майда структурали, зичлиги юқорига нисбатан ортган, ўсимлик илдизлари учрайди, ҳайвонот инлари кам учрайди, ифлословчи моддалар кўзга кўринмайди, тошлар кўп учрайди, ранги билан кейинги қатламга ўтади.
20-60 см. Оч қўнғир рангли, намлиги бир оз ортган, структурали, кесакчали, ўрта қумоқли, юқори қатламга нисбатан зичлашган, ўсимлик илдизлари кам учрайди, ҳайвонот оламининг инлари учрамайди, йирик ва ўртача тошлар кўп, ифлословчи моддалар кўзга кўринмайди, кейинги қатламга механик таркиби билан ўтади.
60-100 см. Оч қўнғир рангли, намлиги юқори, оғир қумоқли, кам миқдорда кесакчасимон ва чангсимон структурали, кучли зичлашган, ўсимлик илдизлари ва ҳайвонот инлари учрамайди, тошлар кам учрайди, ифлословчи моддалар кўзга кўринмайди, кейинги қатламга тошларнинг камлиги билан ўтади.
100-140 см. Оч тусли, оғир қумоқ механик таркибли, намлиги юқори, структурасиз, ифлословчи моддалар кўзга кўринмайди, тошлар учрамайди, ўсимлик илдизлари ва ҳайвонот инлари учрамайди.
Ушбу ҳолат биринчидан ифлословчи манба атрофида тупроқларнинг А, Б, С, Д қатламлари бузилиб, шағаллар билан аралашиб кетган, иккинчидан, тутун таркибида чиқаётган кул элементлари тупроқнинг устки қаламида тўпланган. Бундан кўринадики, ифлосланиш жараёни тупроқнинг морфологик белгиларига таъсир қилган. Тадқиқотлар учун қазилган бошқа кесмаларнинг морфологик белгилари ҳам ҳудди шунга ўхшашдир.