Ўзбекистон республикаси олий ва ўрта махсус таълим вазирлиги ўрта махсус, касб-ҳунар таълими маркази

Фаннининг мақсади: Автомобилларда юк ташиш фани транспортда йўловчиларни ташиш жараёни ва унинг асосий элементларини, асосий иш кўрсаткичларини, юк ортиш-тушириш ишларини, транспорт экспедиция хизмати ишларини ташкил қилиш ҳамда тезкор бошқаришни ўргатишни кўзда тутади.
Фаннинг вазифалари: Автомобилларда юк ва йўловчилар ташишни ташкил этиш, мамлакат ягона транспорт тизими иш сифати ва самарадорлигини ошириш билан яқиндан таништириш. Шу билан бирга юк ва йўловчилар ташиш билан боғлиқ транспорт жараёнларини ташкил қилиш усуллари бўйича билим бериш.
Фан бўйича ўқувчининг ўзлаштириши лозим бўлган билим ва кўникмалари
Билим: Фанни ўрганиш натижасида ўқувчилар қуйидаги билимларга эга бўлишлари керак:
Транспорт жараёни ва унинг асосий элементлари, юк ва йўловчилар оқими, асосий тасарруф кўрсаткичларини, юк ортиш-тушириш ишлари, турли хилдаги юкларни ташиш усуллари, транспорт-экспедиция ишлари ташкил этилиши, тезкор бошқариш.
Кўникма: Фанни ўрганиш натижасида ўқувчилар қуйидаги кўникмаларга эга бўлишлари керак:
Ҳаракатланувчи таркиб иш кўрсаткичларини ҳисоблаш, юк ва йўловчилар оқимини аниқлаш, ҳаракат таркиби танлаш, юк ортиш-тушириш усулларини қўллаш, ҳаракат графикларини тузиш, илғор замонавий техникалардан фойдаланиб тезкор бошқариш усулларини қўллаш, транспорт-экспедиция ишларини бажариш.
Фаннинг ўқув режадаги бошқа фанлар билан ўзаро боғлиқлиги,
услубий жиҳатидан узвийлиги ва кетма-кетлиги
Ушбу фанни ўзлаштириш учун ўқувчи “Умумтаълим” фанларидан физика, математика ва кимё, география фанларини, шунингдек иқтисодиёт асослари каби фанларни чуқур ўзлаштирган бўлишлари талаб этилади. Ўқувчи математика ва физика фанларидан хабардор бўлсагина автомобиль транспортининг асосий иш кўрсаткичларинининг моҳияти ва аҳамиятига тўғри баҳо бера олади. Ўқувчи-талаба кимё фанида олган билимларига таяниб турли хилдаги юкларни ташиш технологиялари, юк турига мослаб омборлар танлаш ва уларнинг вазифаси нималардан иборат эканлигига жавоб бера олади. Ўқувчи-талабага география ва иқтисодиёт асослари фанларидан олган билимлари юк ва йўловчиларни ташишда йўналишларни тўғри танлаш ва унинг самарадорлигини таъминланишини англашига ёрдам беради. Шунинг учун ўқув режага кўра юқорида келтирилган фанларни ўзлаштирилгандан сўнг ўқувчи-талаба “Автомобилларда ташиш” фанини ўзлаштиришга кириши кўзда тутилган.