Ўзбекистон республикаси олий ва ўрта махсус таълим вазирлиги фарғона давлат университети география кафедраси

ЎЗБЕКИСТОН РЕСПУБЛИКАСИ ОЛИЙ ВА ЎРТА МАХСУС ТАЪЛИМ ВАЗИРЛИГИ
ФАРҒОНА ДАВЛАТ УНИВЕРСИТЕТИ


ГЕОГРАФИЯ КАФЕДРАСИ

“АМАЛИЙ ГЕОГРАФИЯ” ФАНИДАН НАМУНАВИЙ ФАН ДАСТУРИ АСОСИДА ТАЙЁРЛАНГАН МАЪРУЗАЛАР МАТНИ

А.А. ҲАМИДОВ
ФАРҒОНА -2019


1-Мавзу:Фаннинг назарий машғулотлари мазмуни

1.Амалий география фани ҳақида тушунча: Амалий география ҳозирги замон географик тадқиқот йўналишларидан бири. Амалий география ҳудудлар табиий шароитларини ҳар хил амалий (конструктив) мақсадларда - ердан қишлоқ ҳужалигида фойдаланиш, йўл, шаҳар ва саноат гидротехник иншоотлар қуришни, кишиларнинг турмуш шароитлари ва соғлиғига мос келиш-келмаслиги нуқтаи-назардан ўрганади.

Амалий географик тадқиқотлар муаммоси дунёнинг кўпчилик мамлакатларида махсус кенгашларда муҳокама қилиб келинмоқда. Халқаро География Иттифоқи (ХГИ) нинг 20- ва кейинги конгрессларида aмалий география бўйича доимий комиссия тузиш тўғрисида қарор қабул қилинди, комиссияга ўтган асрнинг 70 йилларида 41 та мамлакатдан вакил кирган эди. Ҳозирда мамлакатларнинг ва ундаги вакилларнинг сони анча ортган.

2.Бакалавриатуранинг 4 – курс география йўналиши талабалари географиянинг бевосита амалиёт билан боғлиқ соҳалари ҳақида билимга эга бўлиши катта аҳамиятга эга. Чунки қишлоқ хўжалик ва шаҳарсозлик мақсадларида олиб бориладиган ландшафт тадқиқотлар тўғрисида билимга эга бўлиши, инженер-географик йўналиш, географик баҳолаш ва географик башорат, геоекологик муаммолар, ер ва сув ресурсларидан фойдаланиш, табиий шароит ва ресурсларни иқтисодий жиҳатдан баҳолаш ва башоратлаш кабилар ушбу фаннинг долзарблигини асослаб беради ва фаннинг предмети сифатида майдонга чиқади.

3.Амалий географиянинг ўрганиш объектлари: унинг ўрганиш объекти табиат ва жамият бўлиб улар табиат-техника-инсон тизимидаги фаолиятлар орқали амалга оширилади.
4.Амалий географиянинг мақсади: Амалий географиянинг асосий мақсади географик илмий ва амалий билимларни янада чуқурроқ таҳлил қилиш, табиат ва жамиятдаги мавжуд ҳамда вужудга келаётган турли муаммоларни ҳал қилишнинг амалий (конструктив) негизларини илмий асослашдан иборат.