Ўзбекистон Республикаси Олий ва ўрта махсус таълим вазирлиги Бобур номидаги Андижон Давлат университети

58-8 моддада совет ҳокимиятига, унинг инқилобий ишчилар ва деҳқонлар ташкилотларига қарши қилинган террорчилик актлари ва ана шундай актларни бажаришда иштирок этганларга нисбатан ҳам жиноят кодексининг 58-2 –моддасини қўллаш белгиланган.
58-9- моддада аксилинқилобий мақсадда темир йўллари ёки умуман йўллар ҳамда алоқа воситалари, сув иншоатлари, жамоат омборлари ёки иншоатлари, давлат ва жамоат мулкларини бузган ёки зарар келтирганларга нисбатан ҳам кодекснинг 58-2- моддаси қўлланилиши кўрсатилган.
59-10-моддада совет ҳокимиятини ағдаришга, қўпоришга, заифлаштиришга ёки айрим аксилинқилобий жиноятлар содир этишга даъват этувчи тарғибот-ташвиқот олиб борганларга, шунингдек, ана шундай мазмундаги адабиётларни яратган ва сақлаган, уларни тарқатганларга нисбатан 6 ойдан кам бўлмаган муддатга озодликдан маҳрум этиш кўрсатилган.
Шунингдек, оммавий ғалаёнлар ва ҳарбий ҳолат ёки оммавий диний, миллий ҳаракатларда иштирок этганларга нисбатан жиноят кодексининг 58-2- моддаси қўлланилган.
Советларга қарши тарғибот айби бўйича 6 ойдан кам бўлмаган қамоққа ҳукм этилиши белгиланган. Аммо, амалиётда бундай фаолият учун отув жазоси қўлланилган. Бундай холатларни Ўзбекистон мисолида ҳам кўришимиз мумкин. Бу ҳақдаги маълумотлар 5 жилдлик “Қатағон қурбонлари” хотира китобида келтирилган.
Яна шуни айтиш керакки, диний зиддиятлардан фойдаланиб советларга қарши ташвиқот олиб борганлар қуролли қўзғолонда қатнашган даражасида ҳисобланиб отувга ҳукм этилган. Бу борада ҳам Ўзбекистонда кўплаб мисоллар бўлганлиги аниқланди.
58-13- моддада Чоризм тузими даврида ишчилар синфига ва революцион ҳаракатга қарши фаол кураш олиб борган ва фаол ҳаракатда бўлган, масъул ёки махфий (агентура) лавозимларида ишлаган ёки гражданлар уруши даврида аксилинқилобий ҳукуматда бўлганлар ҳам жиноят кодексининг 58-2- моддаси билан жазога тортилиши белгилган.
Шуни ҳам айтиш керакки, 2- Жаҳон уруши йилларида фашистлар билан ҳамкор бўлганлар, ёки СС легионларида бўлганлар ҳам ана шу модда билан жазоланганлар.