Ўзбекистон Республикаси Олий ва ўрта махсус таълим вазирлиги Бобур номидаги Андижон Давлат университети

58-3- моддада аксилинқилобий мақсадда чет эл давлатлари ёки унинг айрим вакиллари билан алоқада бўлганлиги, Советлар Иттифоқи билан уруш ёки интервенция йўли билан ёки қамал қилишга қаратилган хатти –ҳаракатлар, кўмак беришда айбланганлар ҳам 58/2 –модда бўйича жазога тортилиши кўрсатилган.
58-4- моддада капиталистик тузум ўрнига коммунистик тузумнинг майдонга келишини тан олмаган, уни ағдаришга интилган халқаро буржуазиянинг бир бўлагига ҳар қандай усул билан ёрдам бераётганлар ёки ана шу буржуазиянинг таъсири остида қолган ёки Совет Иттифоқига қарши душманликни амалга ошираётган ижтимоий гуруҳлар ва ташкилотлардаги кишилар мулки мусодара этилиб, ўзларини отувга ҳукм этишгача чора кўриш, ундайларни ҳалқ душмани деб эълон қилиш, СССР ва Иттифоқчи республикалар фуқаролигидан маҳрум қилиш, мулкини мусодара этиб Совет Иттифоқи ҳудудидан ҳайдаб юбориш кўзда тутилган.
58-5- моддада чет эл давлати ёки ундаги қандайдир ижтимоий гуруҳ вакиллари билан алоқада бўлиб, сохта ҳужжатлардан ёки бошқа воситалардан фойдаланиб уруш эълон қилиш, Совет Иттифоқи ишларига қуролли аралашиш ёки бошқа ножўя ҳаракатлар содир этиш, хусусан, блокада қилиш, Совет Иттифоқи ёки Иттифоқчи республикалар давлат мулкларини босиб олиш, дипламатик алоқаларни бузиш, Совет Иттифоқи билан тузилган шартномаларни йўқ қилиш ва шунга ўхшаш ҳаракатлар учун ҳам жиноят кодексининг 58-2 моддасида кўрсатилган ижтимоий ҳимоя қилишнинг олий чораси – отув қўлланилиши белгилаб берилган.
58-6- моддада жосуслик, яъни маҳсус муҳофазада бўлган давлат сирларини чет эл давлатларига, аксилинқилобий ташкилотларга ёки ҳусусий шахсларга бериб юбориш мақсадида ўғирлаш, ёки йиғиб юриш билан шуғулланганларга нисбатан 3 йилдан кам бўлмаган қамоқ жазоси қўлланилиши кўрсатилган. Агарда жосуслик ССР Иттифоқига алоҳида оғир оқибатларга олиб келса, у ҳолда бундай шахсга нисбатан олий жазо- отув ёки меҳнаткашлар душмани деб эълон қилиб фуқаролик ҳуқуқидан маҳрум этиб, мулкини конфискациялаб, ўзларини ССР Иттифоқи ҳудудидан хайдаб юбориш белгиланган.
58-7- моддада давлат саноати, транспорти, савдоси, пул муомалалари, кредит тизими, шунинг баробарида кооперацияни қўпориш мақсадида ва аксилинқилобий мақсад йўлида давлат муассасалари ва корхоналаридан фойдаланиш ёки улар фаолиятига қарши турганларга ҳам мазкур кодекснинг 58-2 моддасидаги жазо чоралари кўриш кўзда тутилган.