Ўзбекистон республикаси олий ва ўрта махсус таълим вазирлиги қарши давлат университети

Танги индикатори. Танги – тожикча сўз бўлиб, орографик термин сифатида «дара, тор ўтиш жойи» маъноларини ифодалайди. Ўзбекистоннинг кўпгина жойларида учрайди. Озарбайжонда танга «чуқур дара». Бу термин С. Қораев томонидан илмий географик адабиётга киритилган³. Оронимик индикатор сифатида топонимлар таркибида учрайди: Каттатанги (катта дара), Тортанги, Ичкаританги, Чортанги (Зомин тумани). “Бобурнома”да дара маъносида қўлланган: Ғурбанд тангиси⁴, Дорута тангиси⁵.
Жанубий Ўзбекистон оронимиясида бу индикатор Тангсар – асли кўриниши Тангиҳисор (До., адир) ороними таркибида учрайди.
Тарам индикатори. Тарам сўзи орографик термин сифатида чўққи, қоя сингари учли баландликларнинг тизмасимон ёки қирга ўхшаш бир қисмининг ёнма-ён келиши билан боғлиқ тушунчани ифодалайди⁶. У маҳаллий характердаги оронимик индикатор сифатида Жанубий Ўзбекистон оронимларининг ясалишига хизмат қилади: Тўғизтарам (До., қоя, баландлик).
Тарпи индикатори. Тарпи сўзи маҳаллий шевага хос бўлиб, у орографик термин сифатида “адир ва тоғ этакларида ошиб ўтиладиган йўли бўлган баландлик” тушунчасини ифодалайди. Демак, бу термин адабий тил доирасида қўлланадиган “довон” орографик терминининг маҳаллий кўринишларидан бири ҳисобланади. Бу терминдан ясалган Тарпи, Каттатарпи, Кичиктарпи (Чр., баландликлар) оронимлари мавжуд.
Тахта индикатори. Тахта сўзи форс-тожикча тахт “текис жой, ҳукумдорлар ўтирадиган жой” маъноларидаги сўз билан алоқадор. Оронимлар ва бошқа турдаги жой номлари таркибида орографик термин сифатида учрайди. Орографик термин сифатида тоғ устидаги катта текис жой, токчадан йирик бўлган текислик маъноларини беради. В.И. Савинанинг келтиришича, унинг техт шакли тоғ тизмаси турини ифодалаб, Эроннинг марказий қисими, Хуросон ва Язд вилоятлари оронимиясида мавжуд¹. Жанубий Ўзбекистоннинг Тахтақорача (Самарқанд билан Китоб ўртасидаги довон), Авғонтахта (До., баландлик), Етимтахта (До., баландлик), Бештахта ( Бс., қ-қ. – аслида адир номи бўлган) каби топонимлари таркибида учрайди.