Ўзбекистон республикаси олий ва ўрта махсус таълим вазирлиги а. А. Омонов, Т. М.ҚОралиев пул, кредит ва банклар

12.4. Тижорат банкларининг ноаънанавий операциялари

Бозор иқтисодиёти шароитида тижорат банклари мижозларнинг молиявий хизматларга бўлган эҳтиёжларини қондириш ва фойда манбасини ошириш мақсадида қатор ноаънанавий операцияларни бажаради. Бундай операциялар сирасига факторинг, кредит – ижара (лизинг), контокоррент

(овердрафт), форфейтинг, траст каби операцияларни киритиш мумкин.


12.4.1.Факторинг операциялари


Факторинг операцияларида банклар товар сотиб олувчининг қарз ҳужжатларини сотиб олади, унда асосан учта томон иштирок этади.

Биринчиси, фактор – воситачи, банкнинг факторинг операцияларини бажарувчи бўлими. Одатда, ривожланган мамлакатлар тажрибасида факторинг операцияларини амалга оширишга ихтисослашган факторинг компаниялари ташкил этиш амалиёти ҳам мавжуд.

Иккинчиси, мижоз (товар сотувчи ёки хизмат кўрсатувчи), фактор – воситачи билан контракт тузувчи саноат ёки савдо фирмаси.

Учинчиси, товар сотиб олувчи.

Мижоз сотилган товар ёки кўрсатилган хизматлар учун олиниши лозим бўлган пул маблағини талаб қилувчи ҳужжатлар асосида “фактор – воситачи” билан факторинг операцияси бўйича шартнома тузади. Фактор – воситачи

270
имзоланган факторинг шартномаси асосида, маълум комиссион тўлов ҳисобига мижозга сотилган товар ёки кўрсатилган хизматларга тўловни амалга оширади. Соддароқ қилиб айтганда, фактор – воситачи мижоздан товар сотиб олувчига маблағларни тўлаш билан боғлиқ тўлов ҳужжатларни комиссион тўлов асосида “сотиб олади”.

Фактор – воситачи мижоз билан факторинг операциясини имзолаётганда товар сотиб олувчининг молиявий ҳолатини оқилона баҳолаши жуда муҳим ҳисобланади. Агар сотиб олувчининг молиявий ҳолати ёмонлашиб, факторинг операцияси бўйича фактор – воситачи томонидан мижозга тўлаган суммани тўлай олмаса, ушбу зарар фактор – воситачининг гарданига тушади.

Иқтисодиётда факторинг операцияларни вужудга келишининг асосий омиллари сифатида қуйидагиларни таъкидлаш мумкин:

– сотиб олувчи корхона ва ташкилотлар олинган товар ёки кўрсатилган хизматларга тўлаши лозим бўлган маблағларни ўз вақтида тўлаш имкониятларининг мавжуд эмаслиги. Бу қатор ижтимоий – иқтисодий оқибатлар туфайли вужудга келади;

– товар сотувчи ёки хизмат кўрсатувчи мижознинг ишлаб чиқариш жараёнини доимий равишда давом эттириб туриши учун молиявий маблағларга бўлган эҳтиёжини таъминлашнинг зарурлиги;

– банкларнинг молиявий маблағлардан самарали фойдаланиш ҳисобига қўшимча фойдани шакллантиришга бўлган эҳтиёжининг мавжудлиги.