Ўзбекистон Республикаси Хал= таълими вазирлиги

14-мавзу: «Ростгўйлик»


Гул ўстиролмаган бола
(Корейс халқ эртаги)
Кадим замонда бир мамлакатга донишманд ва бахтли бир подшо ҳукмронлик қилган экан. Унинг кайфини фақат қарилигу, бефарзандлик бузар экан, холос. Кунлардан бир куни подшо: “Мамлакатдаги энг виждонли болани топиб, уни ўзимга ўғил қилиб олсам”, деб ўйлабди. У ҳамма болаларга гул уруғи улашишни буюрибди-да:
- Кимки шу уруғдан энг чиройли гул етиштирса, у менинг ўғлим ёки қизим бўлади,-деб эълон қилибди.
Ҳамма болалар уруғни экиб, эрталаб ва кечқурун суғоришибди.
Қобил деган бола ҳам уруғни экиб, роса парвариш қилибди. Лекин ўн кун-ўн беш кун, бир ой ўтса ҳамки, гултувакка экилган уруғ қилт этмасмиш. “Бу қанақаси бўлди?”-деб ҳайрон бўлибди Қобил ва онасидан сўрабди:
- Нега мен эккан уруғ униб чиқмаяпти? Онаси ҳам шундан ташвишланиб юрган экан:
- Тупроғини янгилаб кўр­чи,-дебди.
Қобил гултувакдаги тупроқни алмаштирибди. Бу сафар ҳам уруғ кўкармабди.
Подшо гулларни кўрадиган кун етиб келибди. Кўпгина болалар ясанишиб, тувакда ўзлари ўстирган гулларни кўтариб йўлга чиқишибди. Уларнинг ҳаммаси валиаҳд, шаҳзода бўлиш орзусида экан. Хўш, кейин нима бўлибди, денг? Негадир қирол гулларга қараб ҳамма болаларнинг олдидан ўтиб кетаверибди. Унинг чеҳрасида шодликнинг учқуни ҳам кўринмабди.
Иттифоқо у бир уйнинг олдида бўш гултувак кўтариб йиғлаб турган Қобилни кўриб қолибди. Подшо ўша болани чақириб келишни буюрибди.
-Нима учун сен бўш гултувак ушлаб турибсан?-деб сўрабди у.
Қобил пиқ-пиқ йиғлаб, кунлардан бир куни бировнинг боғидан эгасига билдирмасдан олма узганини, шунинг учун бўлса керак, қанча уринса ҳам уруғни ундира олмаганини гапириб берибди.
Бу гапни эшитган подшо Қобилни кўтариб олибди-да:
- Мана менинг пок виждонли ўғлим,-дебди. Одамлар орасида ғовур-ғувур бошланибди.
- Подшо нима учун гултуваги бўш болани ўғил қилиб олди?
Шунда Подшо тушунтириб берибди:
- Эй, ҳалойиқ, мен болаларга улашган гул уруғи қайнатилган эди.
Шундан кейин одамлар подшонинг фикрини маъқуллашибди. Ранг-баранг гуллар кўтариб турган болаларнинг юзлари уялганларидан қип-қизариб кетибди. Чунки уларнинг ҳаммаси бошқа гул уруғи топиб эккан эканлар-да.


Мақоллар
Аввал ўйла, кейин сўйла.
Айбига иқрор – мард киши, яширмоқ - қўрқоқ иши.
Бошингга қилич келса ҳам, тўғри сўйла
Тили тўғрининг дили тўғри. Тили тўғрининг йўли тўғри.
Ёлғон уялтирар, рост суюнтирар.
Ёлғончининг рост сўзи ҳам ёлғон.