Ўзбекистон республикаси фавқулодда вазиятлар вазирлиги академияси ҳузуридаги фуқаро муҳофазаси институти

Иқтисодий тадбирлар. Маълумки, техник тараққиёт кундан-кунга жадаллашиб бораётган ҳозирги замонда техноген омилларнинг атроф-муҳитга таъсири ортиб бормоқда. Бундай шароитда техноген омилларнинг атроф-муҳитга таъсирини камайтириш тадбирларига қаратилган молиявий сарф харажатлар миқдорини ошириш талаб этилади. Иқтисодий тадбирларга, шунингдек, табиатни муҳофаза қилиш соҳасига инвестицияларни жалб қилиш ҳам киради. Бундай тадбирларга экологик тоза технологияларни жорий этиш, чиқинди сувларни тозалашлар киради [40].
Технологик тадбирлар. Бутун дунёдаги ҳозирги экологик вазият иқтисодиётнинг ҳозирги техноген ривожланишидан бутунлай янги босқичга ўтказиш лозимлигини кўрсатмоқда. Сўнгги пайтларда илмий ва сиёсий доиралар “яшил” иқтисодиётга ўтиш лозимлиги ҳақида кўп гапирилмоқда. “Яшил” иқтисодиётга ўтишнинг ягона йўли эса инновацион технологияларни ривожлантириш орқали амалга оширилади. Экологик инновацияларга табиий бойликларни тежашга қаратилган технологияларни ривожлантириш, экологик тоза маҳсулотлар ишлаб чиқариш, ишлаб чиқаришни ривожлантиришда менеджмент, экологик маркетинг ва бошқа шунга ўхшаш янги технологияларни қўллашни назарда тутади. Бундай инновацион технологияларни қўллаш натижасида иқтисодий, экологик, ижтимоий ва бошқа самараларга эришиш мумкин.
Технологияларнинг экологик соғломлаштиришдаги ўрнига мисол қилиб, ривожланган мамлакатларда корпорациялар томонидан харажатларнинг 65%и илмий тадқиқотларга сарфланишини мисол қилиб келтириш мумкин [41].
Экологик ҳолатни яхшилаш учун қуйидаги соҳаларда инновацион технологияларни ривожлантириш мумкин: сув ва атмосферага заҳарли моддаларнинг тушишини камайтириш; сув таъминотида сувни тежовчи инновацион технологияларни жорий этиш; саноат корхоналаридан чиқадиган сувларни чиқинди сувларни тозалаш ва ҳакозо [60].
Ташкилий тадбирлар. Экологик вазиятни яхшилашга қаратилган муҳим масалалардан бири бу экологияни яхшилашга қаратилган ташкилий ишларни йўлга қўйиш ҳисобланади. Бундай ташкилий ишларга атроф-муҳит зарарланишининг олдини олишга қаратилган тадбирлар, табиий бойликлардан, айниқса сувдан самарали фойдаланилишини бошқариш, жамоатчиликни экология билан боғлиқ муаммоларни ҳал қилиш ишларига жалб қилиш ва бошқа тадбирлар киради.