Ўзбекистон республикаси адлия вазирлиги

3.3. Fuqarolik protsessida taraflar tushunchasi va turlari

Da’vo tartibida ko‘riladigan fuqarolik ishlarida taraflar protsess ishtirokchilari ichida markaziy va asosiy o‘rinni egallaydi. Aynan taraflar fuqarolik huquqiy munosabatlardan kelib chiqadigan kelishmovchiliklarning manbai hisoblanadi, ularning tashabbusi bilan fuqarolik sud ishlarini yuritish qo‘zg‘atiladi, aynan ular o‘rtasida kelishuv bitimining tuzilishi ish yuritishni tugatishga olib keladi va hokazo.

FPKning 43-moddasi birinchi qismiga binoan da’vogar va javobgar fuqarolik protsessining taraflaridir. Demak, fuqarolik protsessida ikki taraf: da’vogar va javobgar ishtirok etadi. Bu o‘rinda har ikki tomonda necha shaxs ishtirok etishi ahamiyatga ega emas. Masalan, ishga tiklash, majburiy bekor yurgan vaqti uchun ish haqi undirish to‘g‘risida bir necha shaxs sudga da’vo taqdim etgan taqdirda ham ularning barchasi bir taraf, ya’ni da’vogar hisoblanadi. Qonunga muvofiq fuqarolik protsessida taraflar fuqaro va tashkilotlar bo‘lishi mumkin.