Ўзбекистон республикаси адлия вазирлиги

3.7. Suddagi vakillik tushunchasi, ahamiyati va asoslari


Sudda vakillik masalasi amaldagi FPK 7-bobining 65–70-moddalarida belgilangan bo‘lib, sudda vakillik fuqaroning o‘z ishini vakili orqali yuritishi demakdir.
O‘zbekiston Respublikasi Konstitutsiyasining 116-moddasida sud ishini yuritishning har qanday bosqichida malakali yuridik yordam olish huquqi kafolatlab qo‘yilgan bo‘lib, o‘z navbatida, fuqarolar uchun malakali yuridik yordam turli shakllarda berilishi mumkin. Aynan suddagi vakillik malakali yuridik yordam ko‘rsatishning muhim ko‘rinishlaridan biri hisoblanadi. FPKning 65-moddasida fuqarolar o‘z ishlarini sudda shaxsan yoki o‘z vakillari orqali yuritishlari mumkinligi mustahkamlangan bo‘lib, bu fuqaroning ishda shaxsan qatnashuvini inkor etmaydi.
Fuqarolik protsessual huquqiy munosabatlarda vakil oldida turgan maqsadlar o‘ziga xos xususiyatlarga ega, ya’ni birinchidan, vakil vakolat bergan shaxsga malakali yuridik yordam ko‘rsatadi, ikkinchidan esa, sudlar tomonidan odil sudlovning amalga oshirilishiga ko‘maklashadi.
Fuqarolik protsessual huquqiy munosabatlarda protsessual qonunda nazarda tutilgan vositalardangina, ya’ni qarshi da’vo qo‘zg‘atish, e’tiroz bildirish, iltimosnoma bildirish kabilardan foydalanish mumkin.