Ўзбекистон республикаси адлия вазирлиги

18.3. Chet davlat sudlarining sudga doir topshiriqlarini ijro etish va O‘zbekiston Respublikasi sudlarining chet davlat sudlariga topshiriqlar bilan murojaat qilishi

O‘zbekiston Respublikasi sudlari chet davlat sudlarining ayrim protsessual harakatlarni (chaqiruv qog‘ozlari va boshqa hujjatlarni topshirish, taraflar va guvohlarni so‘roq qilish, ekspertiza o‘tkazish, joyida ko‘zdan kechirish va hokazo) bajarish to‘g‘risida belgilangan tartibda bergan topshiriqlarini ijro etadi. Bundan quyidagi hollar mustasno:

1) topshiriqni ijro etish O‘zbekiston Respublikasi suverenitetiga, xavfsizligiga zarar yetkazsa yoki qonun hujjatlarining asosiy prinsiplariga zid bo‘lsa;
2) topshiriqni ijro etish sudning vakolati doirasiga kirmasa.
Chet davlat sudlarining ayrim protsessual harakatlarni bajarish to‘g‘risidagi topshiriqlari O‘zbekiston Respublikasining qonun hujjatlari asosida ijro etiladi. O‘zbekiston Respublikasi sudlari chet davlat sudlariga ayrim protsessual harakatlarni bajarish to‘g‘risida topshiriqlar bilan murojaat qilishi mumkin.O‘zbekiston Respublikasi sudlarining chet davlat sudlari bilan aloqada bo‘lish tartibi O‘zbekiston Respublikasining qonun hujjatlari hamda xalqaro shartnomalari bilan belgilanadi.
Masalan, 1954-yil 1-martdagi “Fuqarolik protsessi masalalari bo‘yicha Gaaga konvensiyasi”ning 8-moddasiga ko‘ra, konvensiya ishtirokchi davlatlarining sud hokimiyatlari fuqarolik yoki savdo ishlari bo‘yicha ikkinchi davlatning vakolatli organlariga protsessual harakatlarni amalga oshirishni so‘rab sud topshiriqlari bilan murojaat qilishlari mumkin.
1993 yilgi Minsk konvensiyasining 6-moddasiga ko‘ra, ishtirokchi – davlatlar protsessual yoki boshqa harakatlarni amalga oshirish yo‘li bilan bir-biriga huquqiy yordam ko‘rsatadilar. Jumladan, protsessual hujjatlarni tuzish va yuborish, ko‘zdan kechirish, tekshirishlarni amalga oshirish, ashyoviy dalillarni yuborish, ekspertiza o‘tkazish, taraflar, uchinchi shaxslar, gumon qilinuvchi, ayblanuvchi, jabrlanuvchi, guvohlar, ekspertlarni so‘roq qilish, shaxslarni qidirish, ularni jinoiy javobgarlikka jalb qilish uchun yetkazib berish yoki hukmni ijroga qaratish, fuqarolik ishlari bo‘yicha sud hal qiluv qarorlarini tan olish va ijro qilish, ijro hujjatlari, shuningdek, boshqa hujjatlar taqdim qilinadi.