Zbekiston respublikasi adliya vazirligi toshkent davlat yuridik universiteti

4.2. DAVLAT FUNKSIYASINING DAVLAT MAQSADI VA VAZIFALARI BILAN O‘ZARO NISBATI

Davlat funksiyalari haqida gapirganda uning maqsadi va vazifalariga ham alohida to‘xtalib o‘tish lozim. Chunki davlat funksiyalari davlat maqsadi va vazifalari bilan chambarchas bog‘liq bo‘lib, davlat o‘z oldiga qo‘ygan maqsadga erishishi uchun ma'lum bir vazifalarni hal qilishi lozim, bu esa, o‘z navbatida, tegishli funksiyalarni amalga oshirish bilan bog‘liqdir.

Maqsad:
— davlatning faoliyatini yo‘naltiruvchi va tartibga soluvchi, uning bajarishi lozim bo‘lgan vazifalari ketma-ketligi va xarakterini belgilab beruvchi bevosita motivi bo‘lib maydonga chiqadi;
— muayyan vazifalarni bajargandan keyin kelajakda yuzaga kelishi mumkin bo‘lgan davlatning obrazi va modeli sifatida namoyon bo‘ladi;
— davlat faoliyatini rejalashtirish va taraqqiyotning muqobil yo‘nalishlarini tanlash imkonini beradi;
— davlat faoliyatini mantiqiylik va tizimlilik asosida amalga oshishini ta’minlaydi;
— maqsadga erishish amaldagi hayotiy vaziyat va maqsad o‘rtasidagi nomuvofiqlikni bartaraf etish jarayoni hisoblanadi.