Zbekiston respublikasi adliya vazirligi toshkent davlat yuridik universiteti

19.5. O‘ZBEKISTON RESPUBLIKASIDA DEMOKRATIK HUQUQIY DAVLAT QURISH VA FUQAROLIK JAMIYATINI SHAKLLANTIRISH MASALALARI

Mustaqillikka erishganimizdan so‘ng, 1992 yil 8 dekabrida O‘zbekiston Respublikasi Konstitutsiyasining qabul qilinishi mamlakat hayotida ulkan siyosiy voqyea bo‘ldi. Mamlakatimizning Asosiy qonunida davlat tuzumi prinsiplarini, fuqarolarning huquq va erkinliklarini, jamiyatni rivojlantirishning iqtisodiy negizlari va strategik yo‘nalishlari va boshqa masalalar mustahkamlab qo‘yilgan.

Konstitutsiyada davlat hokimiyati organlarining avvalgi totalitar tuzumdan mutlaqo farq qiladigan, hokimiyatlarning, ya'ni qonun chiqaruvchi, ijro etuvchi va sud hokimiyatlarining bo‘linishi prinsipiga asoslangan tizimi yaratilganligi ko‘rsatib o‘tilgan. Albatta, har bir davlat huquqiy va demokratik tarzda shakllanishi uchun ushbu hokimiyatning bo‘linishi tamoyiliga amal qilishi lozim.
Huquqiy demokratiya qaror topar ekan, unda respublika aholisining barcha qatlamlari manfaatlari, barcha ijtimoiy guruhlarning milliy va madaniy haq-huquqlari muhofaza etiladi.
Mustaqil O‘zbekiston o‘z xalqi tanlab olgan yo‘l-ochiq erkin bozor iqtisodiyotiga asoslanadigan odil jamiyat, kuchli demokratik huquqiy davlat qurish yo‘lidan bosqichma bosqich olg‘a bormoqda. Biz barpo etayotgan davlat, avvalo, umumjahon sivilizatsiyasiga, davlat qurilishi sohasida taraqqiy etgan boshqa xalqlar erishgan tajribalarga va o‘zimizga xos milliy an'analarga, ijtimoiy qadriyatlarga asoslanmoqda.
Ma'lumki, mamlakatimizda iqtisodiy islohotlarni yanada chuqurlashtirish, fuqarolik jamiyati asoslarini barpo etish, inson huquqlari va erkinliklarini ta'minlash, davlatimizni demokratik davlat darajasiga ko‘tarish, taraqqiy topgan mamlakatlar va xalqlarning hayot darajasiga yetkazib borishdir.
Respublikamizda demokratik huquqiy davlat qurish va fuqarolik jamiyatini shakllantirish yo‘lida demokratik islohotlarni yanada jadallashtirish maqsadida O‘zbekiston Respublikasi Prezidenti Sh. Mirziyoyevning 2017 yil 7 fevraldagi “O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida”gi Farmoni qabul qilingan va unda beshta ustuvor yo‘nalishlar ko‘rsatib o‘tilgan:

• 
  “Davlat va jamiyat qurilishi tizimini takomillashtirishning ustuvor yo‘nalishlari;
  
• 
  Qonun ustuvorligini ta'minlash va sud-huquq tizimini yanada isloh qilishning ustuvor yo‘nalishlari;
  
• 
  Iqtisodiyotni rivojlantirish va liberallashtirishning ustuvor yo‘nalishlari;
  
• 
  Ijtimoiy sohani rivojlantirishning ustuvor yo‘nalishlari;
  
• 
  Xavfsizlik, millatlararo totuvlik va diniy bag‘rikenglikni ta'minlash hamda chuqur o‘ylangan, o‘zaro manfaatli va amaliy tashqi siyosat sohasidagi ustuvor yo‘nalishlar”¹.
  

Yaqin istiqbolda mazkur farmonda ko‘rsatib o‘tilgan ustuvor yo‘nalishlarda belgilab qo‘yilgan vazifalarni amalga oshirilishi, mamlakatimizda qonun ustuvorligiga, inson huquq va erkinliklarini ta'minlanishiga, iqtisodiyotni rivojlanishiga, aholi turli qatlamlari turmush tarzining yuksalishiga hamda respublikamizni demokratik huquqiy davlatlar qatoridan munosib o‘rin egallashiga xizmat qiladi.