Ўзбекистон миллий университети ҳузуридаги илмий даражалар берувчи dsc

III BOB. O‘ZBEKISTON RESPUBLIKASIDA AXBOROT SIYOSATINING USTUVOR YO‘NALISHLARI

O‘zbekiston Respublikasida axborot siyosatining ustuvor yo‘nalishlarini tadqiq qilib, mafkuraviy jarayonlarning globallashuvi sharoitida olib borilayotgan axborot siyosatining maqsadini belgilash, shuningdek, global axborotlashuv sharoitida davlat axborot siyosatining vazifalari, tamoyillari va yo‘nalishlarini tadqiq etish dolzarb vazifa. Ma’lumki, davlatning axborot siyosati aniq maqsadlarga yo‘naltirilgan bo‘lib, bunda davlat, xalq va jamiyat manfaatlari ta’minlanganligi darajasi etakchi o‘rin tutadi.

Mamlakatimizda samarali axborot siyosatini amalga oshirishda ommaviy axborot vositalarining o‘rniga e’tibor qaratib, ular faoliyatidagi ijobiy qirralar tahlili, ularning sonining oshib borishi jamiyatda demokratik jarayonlarning ustuvorligini ta’minlashga xizmat qilishi, shuningdek ularning sifati ham bugungi milliy taraqqiyotimiz asoslarini mustahkamlashni tadqiq etish zarurdir. Ayniqsa, Internet tarmog‘ining tez rivojlanib, jahon axborot maydonida salmoqli o‘rin egallashi, bunda milliy madaniyatimiz rivojiga xizmat qilishi bilan bir qatorda ushbu tarmoqda g‘oyaviy tahdidlar ham ko‘zga tashlanayotganligi bu borada samarali axborot siyosati olib borishni taqozo etadi.

Xususan, global axborotlashuv sharoitida axborot xurujlari kengayishi, ularga qarshi samarali kurash tizimini yaratish, ushbu maqsadni amalga oshirish tajribasiga tayangan holda muammolarni aniqlab, ularni bartaraf etish bo‘yicha taklif va tavsiyalar ishlab chiqish, shuningdek o‘rganilayotgan muammoning istiqbolli qirralarini belgilash taraqqiyotimizning kelajak rivojini ta’minlab beradi .