Ўзбекистон ёшлар иттифоқи марказий кенгаши ўзбекистон республикаси жисмоний тарбия ва спорт давлат қЎмитаси

ЎЗБЕКИСТОН ЁШЛАР ИТТИФОҚИ МАРКАЗИЙ КЕНГАШИ
ЎЗБЕКИСТОН РЕСПУБЛИКАСИ ЖИСМОНИЙ ТАРБИЯ
ВА СПОРТ ДАВЛАТ ҚЎМИТАСИ
ЎЗБЕКИСТОН РЕСПУБЛИКАСИ МАДАНИЯТ ВАЗИРЛИГИ
ЎЗБЕКИСТОН РЕСПУБЛИКАСИ ХАЛҚ ТАЪЛИМИ ВАЗИРЛИГИ
ЎЗБЕКИСТОН РЕСПУБЛИКАСИ ИЧКИ ИШЛАР ВАЗИРЛИГИ
ЎЗБЕКИСТОН РЕСПУБЛИКАСИ СОҒЛИҚНИ САҚЛАШ ВАЗИРЛИГИ
ЎЗБЕКИСТОН РЕСПУБЛИКАСИ МУДОФАА ВАЗИРЛИГИ


ҚЎШМА ҚАРОРИ


Умумий ўрта таълим муассасалари ўқувчи-ёшлари ўртасида “Темурбеклар” ҳарбий-спорт ўйинларини
ташкил этиш ва ўтказиш тўғрисида

“Темурбеклар” ҳарбий-спорт ўйинларини умумий ўрта таълим муассасалари ўқувчи-ёшларининг бўш вақтини мазмунли ташкил этиш, улар ўртасида соғлом турмуш тарзини тарғиб қилиш ва ўзаро маданий-спорт алоқаларни йўлга қўйиш ҳамда ёшларни спорт ўйинларига оммавий тарзда жалб қилиш, дастлабки ҳарбий ва психологик тайёргарликка эга ватанпарвар, масъуллиятли, қийин ва экстримал вазиятларда тўғри ҳаракатланиш кўникмаларини эгаллаган баркамол авлодни тарбиялаш мақсадида Ўзбекистон ёшлар иттифоқи Марказий Кенгаши, Жисмоний тарбия ва спорт давлат қўмитаси, Маданият вазирлиги, Халқ таълими вазирлиги, Ички ишлар вазирлиги, Соғлиқни сақлаш вазирлиги ҳамда Мудофаа вазирлиги қарор қилади:

1. 2018 йилдан бошлаб умумий ўрта таълим муассасаларида “Темурбеклар” ҳарбий-спорт ўйинлари ташкил этилсин.
2. “Темурбеклар” ҳарбий-спорт ўйинларини ташкил этиш ва ўтказиш тўғрисида Низом 1-иловага, Республика Ташкилий қўмитаси таркиби
2-иловага, намунавий Дастури 3-иловага ҳамда вазирлик, идора ва ташкилотлар ўртасидаги вазифалар тақсимоти 4-иловага мувофиқ тасдиқлансин.
3. Белгиласинки, Республика Ташкилий қўмитаси таркибига киритилган вазирлик, идора ва ташкилотларнинг ҳудудий тузилмалари “Темурбеклар” ҳарбий-спорт ўйинларини ташкил этиш ва ўтказиш бўйича масъул ҳисобланади.
4. Қарорни имзоловчи барча вазирлик, идора ва ташкилотлар ўз муассислигидаги нашрлар (“Ёшлар овози”, “Молодёжь Узбекистана”, “Спорт”, “Маърифат”, “Учитель Узбекистана”, “Постда”, “На посту”, “Ўзбекистонда соғлиқни сақлаш”, “Здравоохранение в Узбекистане”, “Ватанпарвар” ва бошқа) орқали “Темурбеклар” ҳарбий-спорт ўйинларини кенг ёритиб борсин.
5. Қўшма қарор ижросининг назорати ҳамда жойлардаги тузилмаларга етказилишини таъминлаш масъул вазирлик, идора ва ташкилотларнинг тегишли бўлимлари зиммасига юклатилсин.