Ўзбекистон давлат жахон тиллари университети роман-герман филологияси факультети 309-гурух талабаси нозимахон хикматованинг

Moddiy javobgarlik
Moddiy javobgarlik - mehnat huquqi boʻyicha mehnat shartnomasi taraflari (xodim va ish beruvchi)ning bir-birlariga yetkazgan zarar qonunda belgilangan miqdor va tartibda qoplash majburiyati. Mehnat shartnomasi yoki unga qoʻshimcha ravishda tuzilgan yozma shakldagi kelishuvda mehnat shartnomasi taraflarining moddiy javobgarligi aniqlashtirib qoʻyilishi mumkin. Bunda shartnoma boʻyicha ish beruvchining xodim oldidagi javobgarligi qonunda nazarda tutilganidan kam, xodimning ish beruvchi oldidagi javobgarligi esa nazarda tutilganidan koʻp boʻlishi mumkin. Zarar yetkazilganidan keyin mehnatga oid munosabatlarning bekor qilinganligi mehnat shartnomasi taraflarini Moddiy javobgarlikdan ozod qilishga sabab boʻlmaydi. Qonunga binoan, mehnat shartnomasining bir tarafi gʻayriqonuniy nojoʻya xulq-atvori (harakati yoki harakatsizligi) natijasida boshqa tarafga yetkazilgan zarar uchun moddiy javobgar boʻladi. Baʼzan ish beruvchi aybi boʻlmagan hollarda ham Moddiy javobgarlik boʻladi. Masalan, ish beruvchi yuqori xavf manbai natijasida xodimning sogʻligʻiga yetkazilgan zarar uchun moddiy javobgar qilinishi mumkin. Zarar kim tomonidan yetkazilganiga qarab, Moddiy javobgarlikning 2 turi ish beruvchiga yetkazilgan zarar uchun xodimning moddiy javobgarligi hamda ishlab chiqarishda xodimning sogʻligʻiga shikayat yetkazilgani uchun, shuningdek, xodimni mehnat qilish imkoniyatidan mahrum etgani (gʻayriqonuniy ravishda ishdan boʻshatganlik) uchun ish beruvchining moddiy javobgarligi farqlanadi. Moddiy javobgarlik bilan bogʻliq masalalar OʻzRning Mehnat kodeksi (12-bob), "Xodimlarga ularga mehnat vazifalarini bajarish bilan bogʻliq holda jarohatlanishi, kasb kasalliklariga chalinishi yoki salomatlikning boshqa xil shikastlanishi tufayli yetkazilgan zararni ish beruvchilar tomonidan toʻlash qoidalari" (1994 yil 1 fevral) asosida hal etiladi. Bundan tashqari, taraflarning moddiy javobgarligi toʻgʻrisidagi ishlarni koʻrishda sudlar amal qiladigan boshqa tegishli normativhuquqiy hujjatlar bor.
Jinoiy javobgarlik
Jinoiy javobgarlik - yuridik javobgarlik turlaridan biri, jinoyat sodir etishning huquqiy oqibati. Jinoiy javobgarlik aybdorga nisbatan jazolash shaklidagi davlat majburlov chorasini qoʻllashdan iborat. Jinoiy javobgarlikka jalb etish jinoyat ishini qoʻzgʻatish, tergov qilishni va sudda muhokama qilishni bildiradi. Huquqiy davlatda jinoyat sodir etganlikda ayblanayotgan har bir shaxs ishi sudda qonuniy tartibda, oshkora ravishda koʻrib chiqilib, aybi aniqlanmaguncha u aybdor hisoblanmaydi. Jinoiy javobgarlikka tortish masalasi qonunlarning tegishli moddalarini qoʻllanish orqali hal qilinadi. Bu hol fuqarolar huquqlari va qonuniy manfaatlarini taʼminlashning muhim kafolati hisoblanadi. Oʻzbekiston Respublikasi Jinoiyat Kodeksiga koʻra, ijtimoiy xavfli qilmish sodir etish paytida qonunda belgilangan yoshga yetgan va aqli raso shaxslargina Jinoiy javobgarlikka tortiladi. Jinoiy javobgarlikka jinoyat sodir etishga tayyorgarlik koʻrish, suiqasd qilish; ogʻir jinoyat sodir etilayotganligi haqida aniq bila turib, tegishli organlarga xabar bermaslik yoki jinoyat vositasi yoki jinoyat natijasida qoʻlga kiritilgan narsalarni olish yoki sotish; shuningdek, jinoyat sodir etilishiga qiziqtirganlik (dalolatchi), tashkil qilganlik (tashkilotchi) va yordam berganlik (yordamchi) ham jinoyat hisoblanadi va Jinoiy javobgarlikni vujudga keltiradi. Oʻzbekiston Respublikasi Jinoyat Kodeksi boʻyicha jinoyat sodir qilgan shaxs muayyan muddat davomida (3 yildan 15 yilgacha) Jinoiy javobgarlikga tortilishi kerak. Agar shu muddat ichida tortilmagan boʻlsa keyin uni Jinoiy javobgarlikga tortish mumkin emas. Biroq tergovdan yoki suddan yashirinib yurganlarga nisbatan bu muddat 25 yil qilib belgilangan. Tinchlik va insoniyat xavfsizligiga qarshi jinoyat sodir qilgan shaxs esa muddat oʻtib ketganligidan qati nazar javobgarlikka tortiladi.