Ózbekistan respublikasí joqarí HÁm orta arnawlí bilimlendiriw ministrligi

Sanaat, awıl xojalıǵı hám sawda. Reformalardıń baslanıwı. XVIII ásirge kelip júdá úlken aymaqtı iyelegen imperiyanıń túrli jerlerde ekonomikalıq hám mádeniy rawajlanıw dárejesi hár qıylı edi. Toqtawsız alıp barılǵan urısler sebepli mámleket byudjeti kemeyip bardı. Mámleket húkimeti Chexiya, Moraviya, Sileziya, keyin bolsa Vengriyanı talaw siyasatın alıp bardı. Bul aymaqlar ǵáziynege Avstriyanıń ózine qaraǵanda kóp salıq tólewge májbúr edi.

XVII ásirdiń 80-jıllarınan Avstriyada merkantilizm ideyaları tarqala baslaydı. Merkantilizmniń Avstriya mektebi wákilleri (olar kameralistler dep atalǵan) ekonomikalıq reformalardıń dástúrin alǵa súrdi.

Reformalar dástúri Iosif I (1705-1711) hám Karl VI (1711-1740) dáwirinde ámelge asırıldı. XVIII ásir basında jańa shólkemlesken manufakturalardı finanslastırıw maqsetinde mámleket banki shólkemlestirildi. 1719-jılı húkimet Fium hám Triest portların ashıq portlar dep járiyaladı hám olardı mámlekettiń ishki aymaqları menen baylanıstıratuǵın jollar qurılısın basladı. Sol jılları Adriatika teńizindegi Avstriya portına tiykar salındı. Eski manufakturalar menen bir qatarda fabrika tipindegi jańa iri manufakturalar payda boldı. 1725-jılı imperator shákirtleriniń diplomsız hám cexlardan tısqarıda ónermentshilik penen shuǵıllanıwǵa ruxsat beriwshi dekret járiyaladı. 1731-jılı Karl VI tárepinen shıǵarılǵan dekret bolsa bárshe cexlardıń sanaat iskerligin jergilikli hákimiyatlar qadaǵalawı astına qoydı.

XVIII ásirde áste-aqırın awıl xojalıǵında ekonomikalıq rawajlanıw júz berdi. Kartoshka, jońıshqa, mákke siyaqlı jańa eginlerdiń payda bolıwı, úsh dalalı egiw sistemasınan waz keshiliwi xojalıqtıń intensiv rawajlanıwına alıp keldi. Awılda qatlamlasıw kúsheyip, bay diyqanlar hám múlksiz kambaǵallardıń sanı artıp bardı. Jersiz qalǵan kambaǵallar esabına awılda jallanba jumısshılar sanı ósti.