Ózbekistan respublikasí joqarí HÁm orta arnawlí bilimlendiriw ministrligi

XVI-XVII ásir birinshi yarımında Germaniya. Diyxanlar urısı jeńiliske ushıraǵan bolsa da, mámlekette bir qatar ózgerislerge alıp keldi. Qubla Germaniyada feodallardıń diyxan xojalıqların tartıp alıw halları toqtadı. Kóterilistiń qaytalanıwı qáwpi astında bir qatar jıyım hám feodal ǵárezlilik túrleri biykar qılındı. Ricarlardıń júzlep sarayları hám monastrları joq etilgenligi de diyxanlardıń jaǵdayın biraz jaqsıladı. Biraq ulıwma diyxanlar urısınan keyingi jaǵday, Germaniyanıń xalıq aralıq siyasiy hám ekonomikalıq dárejesiniń ózgeriwi mámleket xojalıq turmısınıń rawajlanıwdan tómenlewine alıp keldi. Bunıń ústine XVI ásir ekinshi yarımınan baslap Ullı geografiyalıq ashılıwlardıń tásiri sezile basladı. Arqa Italiya hám Germaniya qalaları arqalı ótken sawda jolı aldınǵı abroyın joyttı. Arqa German qalalarınıń Ganza awqamı hám xalıq aralıq sawdanıń Atlantik okeanı jaǵalawlarına kóshkennen soń kriziske ushıray basladı. Niderlandiyadaǵı revolyuciya sebebli ispan húkimranlıǵınan azat golland sawdagerleri nemislerdi Baltik boyı sawdasınan da ayırdı. Bul waqıtta Gollandiya sırtqı sawda boyınsha dún`yada birinshi orınǵa shıǵıp alǵan edi.

XVI ásir baslarında Germaniyada payda bolǵan manufakturalıq islep shıǵarıw hám erkin bazar qatnasıqları rawajlanbay qaldı. Aldın tez rawajlanǵan Saksoniya, Garc hám Tyuringiyadaǵı taw-kán óndirisi awır jaǵdayda edi. Nemis qalalarınıń awır awhalı awıl xojalıq ónimleri ushın ishki bazardı qısqarttı. Endi awıl xojalıǵınıń tek shet ellerge shıǵaratuǵın ónimleri qarıydarǵa iye bolıp qaldı .Bular tiykarınan dán hám sharwashılıq ónimleri edi. XVI ásirdiń ekinshi yarımınan Germaniyada baslanǵan ekonomikalıq krizistiń sebebi tek sawda jollarınıń Atlantik okeanı jaǵalawlarına kóshiwi hám onıń aqıbetinde bazarlardıń joq bolıwı, nemis sawdasınıń turǵınlıǵı da emes edi, al diyxanlar urısı bastırılǵannan soń nemis óndiris tarawı basqa mámleketlerdiń óndiris tarawı menen básekige shıdam bere almaǵanınan edi. Manufakturanıń jaqsı rawajlanıwı ushın onıń qala sheńberinen shıǵıp, awılǵa da jayılıwı kerek edi. Biraq Germaniya shárayatında bul derlik múmkin emes edi. Germaniya taw-kán óndirisindegi kriziste tiykarınan diyxanlar urısınıń jeńiliwi menen baylanıslı edi. Knyaz` hákimyatınıń kúsheyiwi, bul tarawdaǵı isbilermenlik iskerligin toqtatıp qoydı.