Збек шеъриятида лингвистик воситалар ва поэтик индивидуаллик

Тадқиқотнинг республика фан ва технологиялари ривожланишининг устувор йўналишларига боғлиқлиги. Диссертация республика фан ва технологиялари ривожланишининг I. «Ахборотлашган жамият ва демократик давлатни ижтимоий, ҳуқуқий, иқтисодий, маданий, маънавий-маърифий ривожлантириш, инновацион иқтисодиётни ривожлантириш» устувор йўналишига мувофиқ бажарилган.
Мавзунинг ўрганилганлик даражаси. Ўзбек тилшунослиги тадқиқотларнинг бир йўналишида маълум давр тилининг тарихини ўрганиш мақсадида бадиий матнлардан фактик материал сифатида фойдаланиш борасида, иккинчи йўналишида маълум даврнинг ёки турли даврларда яшаган шоир ва ёзувчиларнинг тили ва услубини тадқиқ этиш борасида кейинги йилларда муайян ютуқларни қўлга киритди.²
Мустақиллик йилларида ўзбек бадиий матни муаммоларига, хусусан, унинг лингвопоэтикаси масалаларига бағишланган бир неча диссертациялар ҳимоя қилинди, монографиялар нашр этилди. И.Мирзаевнинг «Шеърий матнни лингвопоэтик талқин қилиш муаммолари», С.Каримовнинг «Ўзбек тилининг бадиий услуби», М.Ёқуббекованинг «Ўзбек халқ қўшиқларининг лингвопоэтик хусусиятлари», М.Йўлдошевнинг «Бадиий матннинг лингвопоэтик тадқиқи» номли докторлик диссертациялари, М.Йўлдошевнинг «Чўлпоннинг бадиий тил маҳорати», Г.Муҳаммаджонованинг «80-йиллар охири 90-йиллар бошлари ўзбек шеъриятининг лингвопоэтик тадқиқи», Д.Шодиеванинг «Муҳаммад Юсуф шеърияти лингвопоэтикаси», Ш.Ҳайдаровнинг «Бадиий матнда парцеллятив конструкцияларнинг қўлланилиши», Д.Жамолидинованинг «Бадиий нутқда парантез бирликларнинг семантик-грамматик ва лингвопоэтик хусусиятлари», Ф.Ибрагимованинг «Бадиий матнда эллипсис ва антиэллипсис», номли номзодлик диссертациялари, М.Муҳиддинов ва С.Каримовларнинг «Ғафур Ғуломнинг поэтик маҳорати», Б.Йўлдошев, З.Шодиевларнинг «Уфқ» трилогиясининг лингвопоэтик тадқиқи масалалари» монографиялари шулар жумласидандир.³ Аммо ўзбек тилшунослигида бу каби монографик кузатишлар Усмон Азим ижодий материали асосида ҳали олиб борилган эмас.
Тадқиқотнинг диссертация бажарилган олий таълим муассасасининг илмий-тадқиқот ишлари режалари билан боғлиқлиги. Диссертация тадқиқоти Самарқанд давлат университети «Ўзбек тили бирликларининг функционал-прагматик ва семантик-услубий таҳлили (синхрон ва диахрон аспект)» мавзусидаги илмий тадқиқот режасининг таркибий қисми сифатида бажарилган.