Замонавий педагогик технологиялар

Ўқув ахбороти бир вақтнинг ўзида тўрт хил - расмли, сонли, символли ва оғзаки кўринишда узатилганида энг мустаҳкам ўзлаштиришга эришилади.
Модулли ўқитиш технологиясини яратишда бунга риоя қилиш мухим ахамиятига эга. Ҳар қайси модул бўйича расмлар блокларида символли аломатларни (саволлар қўйилиши тарзида) жойлаштириш, саволларни расм тарзида тасвир этиш, формулалар, жадваллар, графиклар ва услубий кўрсатма­ларни тақдим этиш, мақсадга мувофиқ бўлади.
Умуман олганда, расмлар блоки, блок-схемалар ва бошқа кургазмали материаллар таҳсил олувчилар учун тарқатма материал вазифасини ўташи мумкин. Шу билан бирга ҳар бир фан, жумладан, модул бўйича атамалар­нинг изоҳли луғати тузилиши мақсадга мувофиқ бўлади. Модулли ўқитиш самарадорлигини ошириш мақсадида ўқитишниннг қуйидаги усулларидан фойдаланиш тавсия этилади: ақлий ҳужум, муаммоли мунозара, эвристик (савол-жавобли) суҳбат, ўқув ишбилармонлик ўйинлари ва ҳоказо.
Шундай қилиб, модулли ўқитишга ўтиш қуйидаги кетма-кетликда амалга оширилади:
I босқич: Ўқув режадаги фанларни макромодулларга ажратиш.
II босқич: Ўқитиш даври сиқилганида, фанларни ўрганишнинг энг мақбул кетма-кетлигини ўрнатиш.
III босқич: Макромодул фанлари ўқув дастурларининг ўзаро боғлиқлигини таъминлаш.
IV босқич: Фанларнинг модулларини шакллантириш.
V босқич: Модулнинг ўқув-кўргазмали материалини ишлаб чиқиш
VI босқич: Модулли ўқитиш принциплари асосида ўқитиш технологиясини лойиҳалаш.
VII босқич: Бир вақтнинг ўзида ўрганиладиган фанларнинг мақбул сонини эътиборга олиб, машғулотлар жадвалини тузиш.
.
Ўқув жараёнининг ташкил этилишини, модулли ўқитиш тизимининг таркибий қисми сифатида қараш мумкин.
Ўқитишнинг модулли тизими хусусиятларидан бири ўқув жараёнини жадаллаштириш ҳисобланади, ушбуни икки йўл билан амалга ошириш мумкин:

• 
  ўқитиш жараёнида модулли ўқитиш принциплари асосида ўқув ахборотини «сиқиш»;
  
• 
  ўқитиш даврини камайтириш туфайли ўқув графигини ва унинг асосида машғулотлар жадвалини мақбуллаштириш.
  

Ўқув жараёнини самарали ташкил этиш шакли бу машғулотларни ҳафталик модулли режалаштириш ва таҳсил олувчилар билимини рейтинг баҳолаш ҳисобланади. Яъни, битта модул (2-3 маъруза ва уларга тегишли амалий ва лаборатория ишлари) бир ҳафтага режалаштирилиши ва у таҳсил олувчилар билимининг тестлар ёки бошқа назорат тури ёрдамида баҳоланиши билан тугалланиши зарур.