Yoshlarda mafkuraviy immunitetni shakllantirish

ART-KITCH-POP MADANIYAT - “Ommaviy madaniyat” mahsulotlari “kitch” mahsulotlar deyiladi. Kitch (nemischa) “arzonlashtirish”, “arzon narsaga aylantirish” degani. Sotsiolog German Broxning fikricha, kitch bu – “o‘xshatish, taqlid qilish tizimi”dir(1969 yil). Olim nimani nimaga o‘xshatish haqida gapirayotir? Albatta, qalbaki narsani asl narsaga, yomon narsani yaxshi narsaga, xunuk narsani go‘zal narsaga o‘xshatish haqida.
BESHINCHI KOLONNA – Ispaniyada 1936-1939 yillar fuqarolik urushida general Frankoning faoliyat yuritgan agenturasi shunday nomlangan. Ko‘chma ma’nosi – dushmanning har qanday yashirin agentlari (diversantlar, sabotajchilar, ayg‘oqchilar, terrorchilar va h.k.).
DAUNSHIFTING (ingl. downshifting, avtomobil tezligini pasaytirish, u yoki bu jarayonni sekinlashtirish, sustlashtirish). Termin «o‘zi uchun yashash», “boshqalar bilan bog‘liq maqsadlarni rad etish” falsafasining maqsadini ifodalaydi.
DEZINFORMATSIYA (fran, des - “salbiy” va information - “axborot”) muayyan guruh va doiralarning g‘arazli maqsadlariga erishish yo‘lida soxta ma’lumotlardan foydalanish asosida ijtimoiy fikrni chalg‘itish maqsadida matbuot, radio va TVda qo‘llanadigan usul, vosita.