Yoshlarda mafkuraviy immunitetni shakllantirish

Dinlararo bag’rikenglik g’oyasi – xilma – xil diniy e’tiqoddagi yoki muayyan dinga e’tiqod qilmaydigan kishilarning bir zamin, bir Vatanda, oliyjanob g’oya va niyatlar yo’lida hamkor va hamjihat bo’lib yashashini anglatadi.
Dunyodagi dinlarning barchasi ezgulik g’oyalariga asoslanadi va odamzodni yaxshilik, tinchlik, do’stlikka da’vat etib keladi. Milliy qadriyatlarning asrlar osha bezavol yashab kelayotgani ham dinning sharofatidandir. Din – insonlarni halollikka, poklikka, yaxshilik bilan yashashni hayot mazmuniga aylantirishni tar’gib qiluvchi, olam va odamning yaralishi haqidagi dunyoqarash shaklidir.
Hozirgi kunda O’zbekistonda o’ndan ziyod diniy konfessiya faoliyat olib bormoqda. Ularning o’z faoliyatlarini amalga oshirish va mamlakat hayotida faol ishtirok etishlari uchun barcha shart – sharoitlar yaratilgan. Bu boradagi huquqiy asoslar O’zbekiston Konstitutsiyasida, “Vijdon erkinligi va diniy tashkilotlar to’g’risida” gi Qonunda o’z ifodasini topgan. Shunday ekan, barchamiz ushbu olijanob g’oya atrofida birlashishimiz, dinni niqob qilib olgan diniy ekstremizm va diniy fundamentalism kabi buzg’unchi g’oya va mafkuralardan yoshlarimizni avaylab – asrashimiz darkor.