Yong‘in xavfsizligi profilaktikasi

Yong‘in habarlovchilarining tasnifi. Yong‘in habarlovchisi bu, - yong‘in haqida odamlarga ommaviy xabar berish uchun mo‘ljallangan moslamadir.
Beradigan signallarining turiga qarab, xabarlovchilar quyidagi ko‘rsatilganlarga bo‘linadi:
a) yorug‘likli;
b) ovozli;
v) nutqli;
g) birga qo‘shilgan.
Ovozli va nutqli xabarlovchilarning soni, ularning joylashtirilishi va quvvati, odamlar doimo yoki vaqtinchalik bo‘ladigan barcha joylarida ovozning etarli balandligini va o‘qilayotgan matnning eshitilishini ta’minlab berishi kerak. Ovozli xabar berish signallari boshqa ovozli signallardan ohangi bo‘yicha farq qilishi kerak.
Boshqarishning turiga qarab, XBEBT avtomatik va yarim avtomatik tarzda boshqariladiganlarga bo‘linadi. Avtomatik tarzda boshqarishda XBEBT avtomatik yong‘in o‘chirish yoki yong‘in signalizatsiyalarning topshiriq impulsi yordamida (bilan) ishga tushiriladi, yarim avtomatik boshqarishda esa XBEBT - avtomatik yong‘in o‘chirish yoki yong‘in signalizatsiyalarning topshiriq impulsi qabul qilinganda, dispetcher tomonidan ishga tushiriladi. Xabar berish tizimini boshqarish, radiouzel xonasidan mahalliy bo‘lishi va dispetcher xonasidan yoki sutka davomida odam bo‘ladigan boshqa xonadan distansion ravishda bo‘lishi kerak.
Ishlash uslubi va tarkibiga ko‘ra, XBEBT mahalliy va markazlashtirilganlarga bo‘linadi. Mahalliy tizimlar bu, - boshqaruv topshirig‘i kelib tushganda, belgilangan hududlarda avtomatik tarzda xabar berish signallarini uzatadigan xabar berish vositalarining majmuidir, masalan, oldindan yozilgan matnli xabarlarni eshittiradi. Markazlashtirilgan XBEBT markaziy boshqaruv blokiga ega bo‘lib, ular avtomatik rejimda ham, yarim avtomatik rejimda ham ishlash qobiliyatiga ega. Bunday tizim yordamida evakuatsiyani tezkorlik bilan boshqarish mumkin. Evakuatsiyani tezkorlik bilan boshqarish esa, vaziyatning juda tez o‘zgarishida yoki o‘zgacha holatlarning yuzaga kelishida zarur bo‘ladi.
XBEBT odamlarni binoni tark etishining tugatilishi uchun zarur bo‘lgan vaqt davomida ishlab turishi kerak. XBEBT ning sim va kabellarini yonmaydigan materiallardan ishlangan qurilish konstruksiyalari, qutilar yoki kanallar orqali o‘tkazish lozim.
Radiouzel xonasi binoning pastki qavatlarida, zina kataklariga kiraverishda joylashgan bo‘lishi kerak. Radiouzelning eshigi yong‘inga qarshi bo‘lishi va olovga bardoshlilik chegarasi 0,6 soatga teng bo‘lishi zarur. Xonani pardozlashda yonuvchan materiallar ishlatilmasligi kerak.