Yo‘l harakati qoidalarining buzilishiga doir ma’muriy ishlarni ko‘rib chiqish tartibi to‘g‘risidagi yo‘riqnoma

VI. Chet el fuqarolarining Qoidalarni buzganligi to‘g‘risidagi ishlar yuzasidan ish yuritish
81. O‘zbekiston Respublikasi hududida bo‘lgan chet el fuqarolari Qoidalarni buzganligi uchun umumiy asoslarda ma’muriy javobgarlikka tortiladi.
Immunitetga ega bo‘lgan shaxslarga nisbatan mazkur Yo‘riqnomaning O‘zbekiston Respublikasi qatnashchi bo‘lgan xalqaro shartnomalar va bitimlarga zid bo‘lmagan qismi qo‘llaniladi.
82. O‘zbekiston Respublikasiga avtosayyoh sifatida kelgan yoki xalqaro yuk (yo‘lovchi)larni tashiyotgan haydovchi tomonidan transport vositasini boshqarish huquqidan mahrum etish jazosi nazarda tutilgan huquqbuzarlik sodir etilganda, huquqbuzarga rasmiylashtirilgan ma’muriy bayonnoma va uning haydovchilik hujjatlari bir sutka ichida buyurtma xat orqali huquqbuzarlik sodir etilgan hududdagi sudga ma’muriy chora ko‘rish uchun taqdim etiladi.
Bunda transport vositasini boshqarish huquqini beruvchi hujjatlar olinganligi to‘g‘risida avtosayyohning eslatmasiga, xalqaro yuklar (yo‘lovchilar)ni tashiyotgan haydovchining bu safarga asos bo‘lgan ruxsatnomasining “qo‘shimcha ma’lumotlar” bandiga yozib qo‘yiladi.
83. Transport vositasini boshqarish huquqidan mahrum etish muddati tugagach, qaytarib olinmagan transport vositasini boshqarish huquqini beruvchi hujjatlar kuzatuv xati bilan O‘zbekiston Respublikasi Tashqi ishlar vazirligiga yuboriladi. Xatda haydovchining fuqaroligi, transport vositasining ro‘yxat raqami, yuki tashilayotgan tashkilotning nomi, transport vositasini boshqarish huquqini beruvchi hujjatlarning olib qo‘yish vaqti va sababi ko‘rsatiladi.
VII. Yakuniy qoida
84. Mazkur Yo‘riqnoma talablarini buzishda aybdor shaxslar qonunchilik hujjatlarida belgilangan javobgarlikka tortiladilar.