Yil kuzgi semestrda o‘tiladigan Konstitutsiyaviy huquq modulidan tayyorlangan yakuniy nazorat turi bo‘yicha imtihon savollari

Quyidagi savollarga javob bering.

2019-yil dekabr oyida Xitoyning Uxan provinsiyasida COVID-19 koronovirus infeksiyasi tarqalib borayotgani aniqlandi. Ushbu infeksiya keyinchalik dunyoning boshqa mamlakatlariga ham tarqala boshladi. Buning natijasida 2020-yil 29-yanvar kuni O‘zbekiston Respublikasi Prezidenti tomonidan “O‘zbekiston Respublikasiga koronavirusning yangi turi kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha respublika maxsus komissiyasini tashkil etish to‘g‘risida” gi F-5537-son farmoyish qabul qilindi. 2020-yil 11-mart kuni Butunjahon sog‘liqni saqlash tashkiloti dunyo miqyosida COVID-19 koronovirus infeksiyasi tarqalib ketgani munosabati bilan pandemiya e’lon qildi. Ushbu kasallik O‘zbekistonga ham kirib keldi va 2020-yil 15-mart kuni mamlakatda karantin e’lon qilindi. Karantin sharoitida kasallikning tarqab ketishini oldini olish maqsadida Respublika komissiyasi tomonidan turli cheklov choralari o‘rnatila boshlandi. Jumladan, avtotransportda ertalab soat 07.00 dan 10.00 gacha va kechki vaqt soat 17.00 dan 20.00 gacha harakatlanishga ruxsat berildi. Qolgan vaqtda harakatlangan fuqarolar javobgarlikka tortildi. U. Baxodirov 2020-yil 5-avgust kuni soat 15.30 da oilasi bilan avtotransport vositasida yaqin qarindoshini ko‘rgani ketayotganda ichki ishlar organi xodimi tomonidan to‘xtatildi va sodir etgan huquqbuzarligi uchun ma’muriy bayonnoma rasmiylashtirildi. U. Baxodirov bayonnomaga imzo qo‘yishdan bosh tortdi. Bunga sabab sifatida O‘zbekiston Respublikasining Konstitutsiyasiga binoan u shaxsiy erkinlik, respublika hududida bir joydan ikkinchi joyga ko‘chish singari huquqlarga ega bo‘lib, ushbu huquqlar daxlsiz ekani, ularni sud qarorisiz cheklab qo‘yishga hech kim haqli emasligini, shunday ekan Respublika komissiyasining qarorlari bilan uning konstitutsiyaviy huquqlari cheklanishi Konstitutsiya va qonunning ustunligi prinsipiga muvofiq kelmasligini aytdi.