Soliq solish ob‘ekti— soliq to’lovchining soliq hisoblanadigan va soliq solish uchun asos bo’lib xizmat qiladigan daromadi, oboroti va mol-mulki tushuniladi. Soliq solish ob‘ektiga foyda yoki daromad, muayyan tovarlar qiymati, yer maydoni, jismoniy va yuridik shaxslarning mulklari, tabiiy resurslardan foydalanish miqdori va boshqalar kiradi. Soliq solish ob‘ekti aslida jamiyatdagi mavjud moddiy va ma‘naviy boyliklarning ayrimlariga qonun yo’li bilan ulardan foydalanuvchi, egalik qiluvchi va tasarruf qiluvchi soliq sub‘ektlarining huquqlariga soliq solishni ifodalaydi. Binobarin, moddiy yoki ma‘naviy boyliklarga mulkiy huquqqa ega bo’lgandagina soliq solish ob‘ekti yuzaga keladi. Masalan, egasiz imoratga soliq solinmaydi, chunki egasiz imoratga nisbatan soliq sub‘ekti mavjud emas, vaholanki, bo’lgan taqdirda ham soliq solish ob‘ekti sifatida imorat emas, balki ushbu imoratga bo’lgan mulkiy huquqqa soliq solinadi. Shu jihatdan aytish mumkinki, soliq solish ob‘ekti aslida yuridik va jismoniy shaxslarning mulkiy huquqi va daromadiga qaratiladi.
Do'stlaringiz bilan baham: |