Янги аср истеъдодлари-2021” Республика кўрик-танловини “online” тарзида ўтказиш тўғрисида

“Янги аср истеъдодлари-2021”

Республика кўрик-танловини “online” тарзида ўтказиш тўғрисида
НИЗОМ

1. 
   Умумий қоидалар
   

1.1. Мазкур низом “Янги аср истеъдодлари-2021” Республика кўрик-танловининг “online” тарзида ўтказиш тартибини белгилайди.

1.2. Кўрик танлов қурилиш соҳасидаги лойиҳа ва ишланмаларни ҳамда инновацион қурилиш технологияларини амалиётда қўллашга қаратилган устувор вазифаларни изчил амалга оширишга қаратилган.
1.3. Кўрик-танловни юқори савияда ўтказиш учун Ўзбекистон Республикаси Қурилиш вазирлиги масъул, Инновацион ривожланиш вазирлиги, Олий ва ўрта махсус таълим вазирлиги, “Ўзсаноатқурилишматериаллари” уюшмаси, Ўзбекистон Бадиий академияси, Ўзбекистон ёшлар иттифоқи ва бошқалар ҳамкор вазирлик ва идоралар этиб белгиланди.


II. Кўрик-танловнинг мақсад ва вазифалари

2.1.“Янги аср истеъдодлари-2021” Республика кўрик-танловининг асосий мақсади иқтидорли ёш талабаларни аниқлаш, уларни қўллаб-қувватлаш, юксак билимли, мустақил фикрлайдиган, ўзи танлаган таълим йўналиши ва мутахассислиги бўйича мукаммал билим ва кўникмага эга бўлган замонавий архитектура лойиҳаларини, муҳандислик ишланмаларини ҳамда қурилиш инновацион технологияларни яратишга қодир, рақобатбардош кадрларни тайёрлаш, авлоддан-авлодга ўтиб келаётган бой маданий меъросини асраб-авайлаш, ёш ижодкорларни тарбиялашда юксак маданият, эркин фикрлаш тафаккурини юксалтириш, инновацион ғояларини рўёбга чиқариш, шу билан бирга “Устоз-шогирд” анъанасини кенг миқёсда ривожлантириш орқали ёш ижодкорларни билимини кенгайтириш ҳамда фаолиятини янада такомиллаштириш ва рағбатлантиришдан иборат.

III. Кўрик-танловни “online” тарзда ташкил этиш

3.1. “Янги аср истеъдодлари-2021” Республика кўрик-танлови (кейинги ўринларда кўрик-танлов деб юритилади) асосий ташкилотчиси Ўзбекистон Республикаси Қурилиш вазирлиги ҳисобланади.

3.2. Кўрик-танлов Ўзбекистон Республикаси Қурилиш вазирлиги раҳбарлигида амалга оширилади.
3.3. Олий таълим муассасаларидан кўрик-танловда иштирок этиш истагини билдирган талабалар Қурилиш вазирлигининг www.mc.uz расмий сайтида берилган ахборот хатидан фойдаланади ва унда белгиланган тартибга амал қилади.
3.4. Кўрик-танлов жараёни ва натижалари тўғрисидаги маълумотлар Қурилиш вазирлигининг www.mc.uz расмий веб сайтида ёритиб борилади.