Xalqaro huquq

KIRISH

Kurs ishi mavzusining dolzarbligi. Bugungi kunda butun dunyoda qurilishlar soni ortib bormoqda: neft va gaz, shaharsozlik, kon- metallurgiya va boshqalarda. Ko‘pchilik investorlar ham bu sohalarda manfaatdor. Qurilish natijalari va uni muvaffaqiyatli amalga oshirish ko‘pincha pudratchining ishiga bog‘liq bo‘ladi. Lekin oddiy shartnomada bir qancha pudratchilar bilan shartnomaviy munosabatga kirishishga to‘g‘ri keladigan buyurtmachining ham o‘rni bor. Bunday holda, tomonlar o‘rtasida tuziladigan pudrat shartnomasining mazmuni va uni tatbiq etilishi muhim ahamiyat kasb etadi.

Qurilish pudrat shartnomalari xalqaro xususiy huquqning tijorat pudrat shartnomalari orasida muhim rol o‘ynaydi. Bu shartnomalar o‘zining qulayligi va ommabopligi bilan ajralib turadi. Bugungi kunda yangi inshootlarga bo‘lgan talabning oshib borishi fonida davlatlar, investorlar va pudrat tashkilotlari o‘rtasida shartnomaviy munosabatlarni takomillashtirish hayotiy zaruratga aylanmoqda. O‘z-o‘zidan qurilish sohasiga qiziqishning o‘sib borishi bunday shartnomaviy munosabatlarni chuqur o‘rganishni taqozo etadi.

Shuningdek, O‘zbekiston Respublikasi bugungi kunda Jahon savdo tashkilotiga qo‘shilish uchun tayyorgarlik ko‘rmoqda. Tashkilotga a'zo bo‘lish qurilish sohasida yangi standartlarni joriy etishni ham talab qiladi. Hozirgi kunda rivojlangan mamlakatlarda qo‘llanilayotgan yangi standartlar va ularning huquqiy asoslari (kontraktlari) asosidagi qurilish tadbirlari mamlakatimiz qonunchiligini isloh qilishni talab etmoqda.