1-мавзу ҳУҚУҚшунос мутахассис шаклланишида замонавий иш кўникмалари ва компетенцияларнинг роли

13-МАВЗУ. ТАЪСИРЧАН РЕЗЮМЕ ВА БОШҚА ШАХСИЙ МАЪЛУМОТЛАР ТУЗИШ

Режа:


1. Резюме, CV, Маълумотнома ҳужжатлари. Улар орасидаги фарқлар.
2. Тўғри резюме тузиш талаблари. Резюме тузилмаси.
3. Резюме тузишдаги хатолар.
4. Ҳуқуқшунос резюмесини тузиш учун тавсиялар.

РЕЗЮМЕ, CV, МАЪЛУМОТНОМА ҲУЖЖАТЛАРИ.
УЛАР ОРАСИДАГИ ФАРҚЛАР.

Агар сиз келажакда иш излашни бошласангиз, эҳтимол “Сизда резюме борми?”, “CVни юборинг”, “Маълумотномангиз (объективка)сиз ҳужжатларингизни кўриб чиқмаймиз” каби ибораларни эшитасиз. Резюме, CV, Маълумотнома ҳужжатлари – бу сизнинг визит картангиз, уларнинг асосий вазифаси иш берувчини шахсингизга эътибор беришга чақириш ва сизни суҳбатга таклиф қилишдир. Келинг, мана шу ҳужжатлар ва улар ўртасида фарқларга тўхталсак.

РЕЗЮМЕ НИМА ВА У НИМА УЧУН КЕРАК?

Резюме – бу сизнинг барча касбий тажрибангиз, ҳозирга қадар эришган ютуқларингиз, шахсий фазилатларингиз, шунингдек, кўникма, билим, таълимингиз ҳақидаги маълумотларни ёзма равишда акс эттирадиган ҳужжатдир.

Резюме тақдим этиш – ишга кириш жараёнининг замонавий расмий этикети, қоидалари элементларидан ҳисобланиб, бир вақтнинг ўзида меҳнат бозоридаги рекламанинг самарали усулларидандир.

Резюменинг мақсади – иш қидирувчининг иш берувчи билан биринчи сиртқи танишувнинг ўзида эътиборини тортиш, унда ижобий таассурот қолдириш ва учрашувга таклиф этилишга эришишдир.

CV ҚАНДАЙ ҲУЖЖАТ?


CV - Curriculum Vitae, лотинча сўздан келиб чиққан бўлиб, “ҳаёт йўли” деган маънони англатади. Ушбу ҳужжатда иш қидирувчи эга бўлган барча мутахассисликлар, таълим олган қўшимча курслари, унинг иш жойлари, барча лавозимлари, бажарган хизмат вазифалари хронологик тартибда акс эттирилади.

Бу ҳужжат резюмега нисбатан анча катта ҳажмдаги ҳужжатдир.
Баъзи СVда ишга кирувчи номзоднинг нашр эттирган ишлари, қатнашган конференциялари, уларнинг номи, стажировкалари ва бошқа маълумотлари ҳам акс эттирилиши мумкин. Шу сабабли CV нинг ҳажми, резюменинг ҳажмидан фарқли равишда, ўнлаб варақдан иборат бўлиши мумкин.
Резюме анча ихчам ҳужжат бўлиб, унда иш қидирувчи касбий фаолиятининг фақатгина энг муҳим томонлари кўрсатилиб, унинг иш тажрибаси, касбий кўникмалари ва эришилган ютуқлари айнан конкрет вакансияга қаратилади ва тескари хронологик тартибда акс эттирилади. Яъни битта номзод ҳақидаги маълумотлар вакансияга қараб турлича бўлиши мумкин.
Кўпчилик RESUME ва СV ларни бир хил кўринишга эга ҳужжат, деб хато ўйлашади. Аслида булар фарқли ҳужжатлардир. Уларни асосий параметрлар бўйича солиштирамиз: