Viloyati xalq ta’limi boshqarmasi tumanidagi

Olimp xudosi Zevs haykali. Greklarning dini ko’p xudolik bo’lib, Zevs xudolarning oliysi, xudolar va odamlarning “otasi” hisoblangan. Uning nomi “yorug’ osmon” degan ma’noni anglatgan. Greklar Zevsga atab ibodatxona va haykal bunyod etganlar. Xudolar podshosi Zevs taxtga o’tirgan holda tasvirlangan. O’ng qo’lida – ma’buda Nikaning haykali, chap qo’lida – muqaddas burgut o’rnatilgan podsholik hassasi, oltin libosga burkangan, tanasi fil suyagidan taroshlangan, ko’zlari qimmatbaho toshlardan yasalgan. Haykalning balandligi 12 metr bo’lgan. Taxtda o’tirgan Zevs haykalini haykaltarosh Fidiy yaratgan.
Ma’buda Artemida ibodatxonasi. Ma’buda Artemida sharafiga Efes shahrida (Turkiya hududi) ibodatxona qurilgan. Artemida Zevsning qizi bo’lgan. U hosildorlik, ov va Oy ma’budasi edi. Ayni paytda hayvonlar homiysi, shuningdek, ayyollar madadkori hisoblangan. Artemida ibodatxonasining tomini qoyatoshlardan ishlangan 18 metrli ustunlar suyab turgan. Ibodatxona ichiga grek rassomlarining ajoyib asarlari joylashtirilgan.

Quyosh xudosi Gelios haykali. Miloddan avvalgi 304-yilda Rodos aholisi shaharning bir yillik qamaldan xalos bo’lganligi sharafiga shahar homiysi , Quyosh xudosi Geliosning haykalini yaratishga qaror qilgan. Haykal bronzadan ishlangan. Haykalning bo’yi 35 metr bo’lgan. Uni haykaltarosh Xeres 12 yil davomida bunyod etgan. Haykalda Quyosh xudosi Geliosning boshi Quyoshga tegib turgandek tasvirlangan. Miloddan avvalgi 224-yilda ro’y bergan zilzila oqibatida buzilib ketgan.
Aleksandr mayog’i. Miloddan avvalgi 283-yilda Misr sohillaridan uzoq bo’lmagan Foros orolida o’sha zamonning ajoyib mo’jizasi – Aleksandr mayog’i bunyod etilgan. Mayoq kemalarning Aleksandriya shahri bandargohiga kirish xavfsizligini ta’minlashga xizmat qilgan. Mayoqning balandligi 120 metr bo’lgan. Uning eng yuqori qismi gumbaz bilan qoplangan. Gumbazning ustiga “dengiz xudosi” Poseydonning 7 metrlik haykali o’rnatilgan. Gumbazni sayqallangan granit ustunlar ushlab turgan. Uning ustki qismida mayoq olovi yonib turgan va kechalari dengizchilarga uzoqdan ko’rinib turgan. Mayoq atrofni kuzatish nuqtasi vazifasini ham bajargan. Mayoq 1500 yildan ortiq vaqt xizmat qilgan.