Veterinariya virusologiyasi

Topshiriq.
Chechak kasalligida biologik namuna qo’yish va virusoskopiya o’tkazish.
Material bilan ta'minlash:
Chechak virusi va sezgir tirik ob'ektlar (xo’roz, kabutar, quyon); sterilizatsiyalangan tish cho’tkasi; steril paxta tamponi; yog’sizlantirilgan buyum oynasi; o’tkir tig’; pinsetlar; 1,2,3 reaktivlar; immersion moy; yoritgichli mikroskoplar; spirtlampasi; distillangan suv.
Mashg’ulotning taxminiy rejasi
l.Mashg’ulotga 5-7 kun qolganda barcha guruh talabalari ishtirokida xo’rozga, quyonga chechak virusini yuqtirish.
2.Nazorat uchun savollar.
3.O’qituvchining tushuntirishi.
4.Namoyish qilish: a) biologik namunaning natijasini; b) chechak kasalligida surtmalar tayyorlash usulini.
5.Talabalarning mustaqil ishlashi: a) chechak kasalligida surtmalar olish; b)Morozov usuli bo’yicha surtmalarni bo’yash; c) surtmalarni mikroskop yordamida qarab ko’rish; d) natijalarini chizib olish.
6.Mashg’ulotga yakun yasash.
7.Navbatdagi mashg’ulot uchun topshiriq berish.
Nazorat uchun savollar.
l.Chechak viruslarini ta'riflab bering.
2.Chechak kasalligining har-xil turdagi hayvonlarda epizootologik, klinik xususiyati qanday?
3.Chechak kasalligiga diagnoz qo’yishning qaysi usullarini bilasiz?
Uslubiy ko’rsatma
Ushbu mashg’ulotga tayyorgarlik ko’rishdagi qiyinchiliklar chechak virusini va unga sezgir bo’lgan tirik ob'ektni tanlash hisoblanadi.
Xo’rozlarga yuqtirish uchun (tirnalgan tojga yoki pat follikulalariga) NR-1 tovuqlardagi chechak virusining vaksina shtammidan foydalaniladi.
Oson topiladigani tovuqlarning chechak. kasalligiga qarshi vaksina sifatida ishlatiladigan kabutardagi chechak virusining N 'yu-D jersi shtammi hisoblanadi.
Ushbu viruslar bilan samarali biologik namunani kabutarlarda qo’yish mumkin.
Yaqin kunlargacha odamlarni emlash uchun ishlatilgan ospovaksina virusini quyonlarning terisini ichiga yuqtirish yaxshi natijalar ko’rsatar edi.
Chechak kasalligida iloji bo’lmagan paytda biologik namuna uchun ko’plab topiladigan tovuq homilalari ishlatiladi. Yuqorida so’z yuritilgan viruslar bilan tovuq homilasining xorionallantois pardasiga yuqtirish tufayli shish avj olib, o’ziga xos tugunchalar (chechakchalar) paydo bo’ladi.
Morozov usuli bo’yicha surtmalarni bo’yash uchun reaktivlar tayyorlash ko’p qiyinchiliklar tug’dirmaydi. Bo’yash uchun to’plamlarni tayyorlash maqsadga muvofiq, bular 1,2 va 3 reaktivlardan, immersion moy, benzin, penitsillin flakonlar, ko’z uchun ishlatiladigan pipetkalardan iborat. Bir to’plamdagi barcha flakonlarni Petri likopchasining qopqog’iga joylashtirib ikki kishiga bir to’plamdan bersa bo’ladi.