Уюшмаган ёшларни бўш вақтини мазмунли ўтказиш, уларнинг бандлигини таъминлашдаги муаммо ва ечимлар

Уюшмаган ёшларни бўш вақтини мазмунли ўтказиш, уларнинг бандлигини таъминлашдаги муаммо ва ечимлар

Фарзандларимизни жисмонан соғлом бўлиш билан бирга маънан етук, мустақил фикрлай оладиган, чуқур билим ва замонавий дунёқарашга эга инсонлар этиб тарбиялашда уларни турли ёт оқимлар таъсиридан асраш муҳим вазифа. Зеро, уларни бузғунчи ғоя ва фикрларга маърифат билан жавоб қайтара оладиган юксак маънавиятли инсонлар этиб тарбиялаш пировард мақсадимиздир. Биз тизимли равишда прокуратура, ички ишлар, тиббиёт, нодавлат нотижорат ва жамоат ташкилотлари билан ҳамкорлик қилаяпмиз.

“Ўқувчилар ўртасида жиноятчилик, хуқуқбузарлик, диний экстремизм ва ақидапарастликнинг олдини олишда оила, маҳалла ва таълим муассасаси ҳамкорлиги”, “Оммавий маданият билан боғлиқ мафкурафий таҳдидлар”, “Ота-она – оила таянчи”, “Гиёҳвандлик – аср вабоси” сингари жуда кўплаб мавзулардаги давра суҳбатлари, очиқ мулоқотларни ташкил этиб келмоқдамиз. “Бепарволик оқибати”, “Адашганлар қисмати” каби видеороликлар намойиши нафақат ўқувчилар, балки уларнинг ота-оналарини ҳам янада ҳушёр ва огоҳ бўлишга чорламоқда.
Ёшлар ўртасида соғлом муҳитни қарор топтиришда, аввало, оила алоҳида ўрин тутади. Боланинг ақлий ривожланишининг 70 фоизи мактабгача ёшга тўғри келишини ҳисобга олсак, оиладаги ижтимоий-маънавий муҳит ёш авлоднинг шаклланишига жиддий таъсир кўрсатишини англаш қийин эмас. Шуларга мос равишда маҳалла фаоллари ва ички ишлар ходимлари ҳудуддаги оилаларнинг турмуш тарзини ҳамда ота-оналарнинг фарзандига нисбатан муносабати ва масъулиятини ўрганиб, зарур ҳолларда кўмаклашиб келмоқда. Ўтказилаётган рейдлар ҳамда жойларда ташкиллаштирилаётган маънавий-маърифий тадбирлар, ота-оналар билан учрашувлар мавжуд муаммоларни ҳал этишда муҳим омил бўлмоқда.
Ота-оналар билан ўтказиладиган учрашувларда болалар оилада етарлича меҳр тополмаслиги оқибатида кўчага чиқиб кетиши мумкинлиги ва бундай салбий ҳолатларнинг олдини олиш лозимлиги, фарзанд учун, энг аввало, ота-она шахсий намуна бўлиши зарурлиги атрофлича тушунтирилаяпти. Ҳудудда ҳуқуқбузарликларнинг олдини олиш, маҳаллани жиноятчиликдан холи ҳудудга айлантиришда ижобий натижалар қўлга киритилмоқда.
Юртимизда жисмоний тарбия ва спортни оммалаштириш, аҳоли, айниқса, ёшлар ўртасида соғлом турмуш тарзини тарғиб қилиш учун зарур шарт-шароитлар яратиш, уюшмаган ёшларни спортга жалб этиш борасида изчил чора-тадбирлар амалга оширилмоқда.
Хусусан, Ўзбекистон Республикаси халқ таълими вазирлиги, Жисмоний тарбия ва спорт вазирлиги ҳамда Ўзбекистон Ёшлар ишлари агентлиги томонидан таълим муассасаларининг спорт заллари, спорт майдонларидан маҳалла ёшлари соат 16:00 дан кеч соат 23:00 гача беминнат фойдалиниши юзасидан қўшма қарор қабул қилингани ҳам сўзимизнинг исботидир.
Қарор ижроси юзасидан Марғилон шаҳар 32-умумий ўрта таълим муассасасида, Орол бўйи маҳалла маркази, аҳоли гавжум жойларга спорт майдонларидан беминнат фойдаланиш бўйича пано ва шиорлар ўрнатилган. Эълондан хабардор бўлган ёшлар эса мактабдаги спорт иншоотларидан фойдаланиб, бўш вақтларини мазмунли ўтказишмоқда.