Ўқув қулланма Тошкент 2011 йил

Назорат саволлари

1. 
   Тўртинчи авлод мобил алоқа (4G) тизимларига тавсиф беринг.
   
2. 
   4G авлод таркибига қандай технологиялар киради (ёки кириши тахмин қилинмоқда)?
   
3. 
   Тўртинчи авлод технологияларининг учинчи авлод технологияларидан асосий фарқлари нимада?
   
4. 
   4G тармоқларида қандай кўп сонли уланиш (каналларни мультиплекслаш) технологияси, қандай модуляция усуллари ва антенна технологияларидан фойдаланиш кўзда тутилган?
   
5. 
   Дунёнинг турли минтақаларида 4G тармоқларнинг ҳозирги ривожланиш ҳолати қандай?
   
6. 
   4G тармоқларида қандай иловаларга имконият яратилади? 4G тизимларида қандай контентдан фойдаланиш кўзда тутилган?
   
7. 
   Ҳозирги ривожланиш босқичида 4G тизимларининг қандай афзалликлари ва камчиликлари мавжуд?
   
8. 
   LTE тизимларининг қисқача характеристикаларини беринг.
   
9. 
   Яқин йилларда LTE технологиясининг ривожланиш истиқболлари қандай?
   
10. 
    WiMAX тизимларининг қисқача характеристикаларини беринг.
    
11. 
    Яқин йилларда WiMAX тизимларининг ривожланиш истиқболлари қандай?
    
12. 
    4G тизимларининг ривожланиши билан боғлиқ қандай муаммолар мавжуд?
    

2-боб. ҲАРАКАТДАГИ РАДИОАЛОҚА ТИЗИМЛАРИ РИВОЖЛАНИШИНИНГ ТАҲЛИЛИ

2.1. Ҳаракатдаги радиоалоқа тизимлари ривожланишининг тавсифи ва тариҳи

Ҳаракатдаги радиоалоқа тизимлари⁷ (ҲРТ) ҳозирги вақтда тақдим этиладиган хизматлар сифати ва ҳажмининг кенгайтирилиши хисобига, уларнинг оммавийлашиши ва фойдаланувчиларнинг индивидуал талабларига мослаштирилиши ҳисобига кескин суръатларда ривожланмоқда. Янги имкониятларнинг ишлатилиши ҳам мавжуд тармоқларнинг такомиллаштирилиши ҳисобига, ҳам глобал тармоқ инфратузилмасини яратиш билан боғлиқ янги техник ечимларнинг ишлатилиши ҳисобига таъминланади. Ўз ўрнида ҲРТ тизимлари ҳам конвергенция, универсаллашиш ва ички рақобат жараёнларини бошдан кечирмоқда. Шу аснода, баъзи бир хизмат турлари ўз умрини ўтаб саҳнадан кетмоқда (масалан, “пейджинг” персонал радиочақирув тизимлари), бошқалари ўзининг функционал имкониятлари билан альтернатив хизматларга яқинлашиб бормоқда (масалан, сотали ва транкинг алоқалар), учинчи ҳолатда эса, бир хизмат иккинчисининг бозорини қамраб олмоқда (масалан, сотали ва йўлдош алоқа тизимлари) ва ҳоказо. “Ҳохлаган хизматни” (яъни, нутқ, маълумот, мультимедиа хизматлари), “ҳохлаган жойда” (глобал кўламларда) ва “ҳохлаган вақтда” (ишда, уйда, дам олишда, йўлда) тақдим этишга қодир бўлган кўпқамровли алоқа тизимининг концепцияси бугунги кунда муайян қирраларга эга бўлмоқда. Лекин янгисини қуриш учун эскисини билиш зарур бўлгани каби, бу тизимларда бугунги кунда амалга ошаётган жараёнларни яхши тушуниш учун ҲРТ тизимларининг туғилиш манбалари ва ривожланишини ёдга олиш ҳам фойдадан ҳоли эмас. Шу мақсадда мазкур бобда ўз ривожланишини давом эттираётган ҲРТ тизимларига қарашли профессионал мобил алоқа (транкинг), сотали алоқа, йўлдошли алоқа ва симсиз телефония⁸ радиоалоқа турлари билан танишиб чиқамиз.