Ҳурматли талаба ва магистрлар

Ҳурматли талаба ва магистрлар!
Сиз мамлакатимизда коронавирус инфекцияси тарқалишига қарши курашиш чора-тадбирлари доирасида 2020 йилнинг 16 мартидан бошлаб таътилдасиз. Шу боис, Сизларга 2019-2020 ўқув йилининг баҳорги семестридаги фаолиятингиз йўналиши бўйича айрим тушунтиришларни бермоқчиман.

• 
  Самарқанд давлат университетида 2020 йил 1 апрелдан бошлаб, ўқитишнинг барча шакллари (кундузги, кечки, сиртқи)да тасдиқланган режа график асосида масофавий ўқитиш йўлга қўйилди. Биринчи навбатда, Сиз фан ўқитувчилари ёки гуруҳ мураббийингиздан ушбу режа графикни сўранг ва унинг мазмунини (фанни қачон ўқиш керак, топшириқларни қачон бажариш керак ва бошқ.) тушуниб олинг.
  
• 
  Сиздан http://md.samdu.uz тизими ва академик гуруҳингиз Теlegram каналига кириб (тизимга кириш бўйича логин ва паролингизни гуруҳ мураббийи ёки ўқув ишлари бўйича декан ўринбосарларидан олиш тавсия этилади), фанлар бўйича юкланган ўқув материалини ўзлаштириш, берилган топшириқларни бажариб бориш, саволлар ва муаммолар юзасидан фан ўқитувчилари, гуруҳ мураббийлари ёки ўқув ишлари бўйича декан ўринбосарларига мурожаат қилиш талаб этилади. Агар Сизда интернет, тизим бўйича муаммолар бўлса, бу борада гуруҳ мураббийларини телефон орқали хабардор қилинг. Унутманг, сизнинг тизимга кириш-чиқиш, ўқув материалларини олиш ва топшириқларни бажариш бўйича фаоллигингиз мониторинги мунтазам автоматик юритилиб борилади, қайд қилинади ва фанни баҳолашда инобатга олинади.
  

• 
  Сизнинг баҳорги семестрдаги фанлардан ўзлаштириш кўрсаткичингиз тизимдаги фаоллигингиз ва фан ўқитувчилари томонидан ўтказиладиган имтиҳонлар орқали аниқланади. Ушбу имтиҳонлар телеграмм канали, телефон алоқаси орқали онлайн тарзда ёки бевосита аудиторияда ўтказилиши мумкин. Бу карантин муддатининг тугаш муддатига боғлиқ.
  
• 
  Битирувчиларга: Сизлар учун белгиланган “Ўзбекистон тарихи” ва “Мутахассислик” фанлари якуний давлат аттестация синовлари онлайн тарзда амалга оширилиш эҳтимоли юқори. Шу боис, Сизларга 2019-2020 ўқув йилининг бошида тақдим этилган ушбу фанлар бўйича якуний давлат аттестацияси саволларига мунтазам тайёрланиб боринг. Мабодо, сизда ушбу саволлар бўлмаса ўқув ишлари бўйича декан ўринбосарларига мурожаат қилинг ва саволлар жамланмасини олинг.
  

Ҳурматли талабалар ва магистрлар, Ўзбекистон Республикаси Президенти Шавкат Мирзиёев коронавирус пандемияси келтириб чиқарган инқирозга қарши курашиш масалалари бўйича видеоселектор йиғилишида “Азиз фарзандларим, уйда вақтингизни бекор ўтказманг! Онлайн дарсларни қунт билан ўзлаштиринг. Китоб ўқинг, билимингизни оширинг, бадантарбия ва жисмоний машқларни бир кун ҳам қолдирманг.” деб алоҳида мурожаат қилди ва Сизларга бугунги кундаги энг устувор вазифаларни белгилаб бердилар, деб ҳисоблаймиз.
ДОИМО СОҒ-ОМОН БЎЛИНГ!!!


А.С.Солеев, Самарқанд давлат университет ўқув ишлари бўйича проректори