Қурилиш материаллари ва конструкциялари ишлаб чиқаришда сифат назоратини ташкил қилиш

4.Sinov laboratoriyasini tashkil qilish
Materiallar, konstruksiya va mahsulotlar sifatiga qo‘yilayotgan talablar oshib borishi nazoratni samarali usullarini qo‘llashni talab qiladi. Laboratoriya va ishlab chiqarish sinovlari ishlab chiqarish nazoratini asosiy elementi bo‘lib, u sex, zavod yoki trest markaziy laboratoriyasida o‘tkaziladi.
Qurilish materiallari, konstruksiya va mahsulotlari ishlab chiqaruvchi har bir zavodda sinov laboratoriyasi tashkil qilinadi. Texnik nazorat bo‘limi uchun joriy sinovlar o‘tkazish, hamda ishlab-chiqarishni tashkil qilish va texnologik jarayonni takomillashtirish uchun sinovlar o‘tkazish zavod sinov laboratoriyasini vazifasiga kiradi.
Laboratoriyada xom-ashyo va yarim tayyor mahsulotlarni qabul qilish nazoratini, texnologik jarayonni, hamda tayyor mahsulot sifatini namunalar va tayyor mahsulotlarni buzib va buzmasdan sinov o‘tkazish yo‘li bilan tekshirishni amalga oshiradi.
Nazorat va sinovlarning barcha turi DAST, texnik shart va maxsus ko‘rsatmalar talablari asosida bajariladi. Sinov natijalari maxsus jurnalda kayd etib boriladi. Bunda materiallar sifati, tayyorlanish texnologiyasi, namunalar qotish sharoiti, sinov sharoiti va natijalar tahlili keltiriladi. Sinov natijalari asosida ishlab chiqarilayotgan mahsulot sifati aniqlanadi va shu asosda tayyor mahsulotlarga pasport yoziladi, hamda sifat ko‘rsatkichlari past bo‘lgan mahsulotlarni brakga chiqariladi.
Sinov ishlarini sifatli bajarilishini ta’minlash uchun laboratoriya xodimlari gidravlik presslar va o‘lchov uskunalarini to‘g‘ri ishlashini nazorat kilib turishi lozim. Laboratoriya xodimlari ishlatilayotgan o‘lchov uskunalarini davriy ravishda Davlat standarti xodimlari tomonidan tekshiruvini tashkil qilishi va har bir sinov uskunasiga sertifikat olishi lozim.
Uskunalarni yangi o‘rnatilganda, ta’mirlangandan so‘ng va joylashish o‘rni o‘zgartirilganda tekshiruv o‘tkazish lozim.
Laboratoriya xonasi ishlab chiqarish binosida yoki zavod hududidagi alohida binoda joylashishi mumkin.