Urganch davlat universiteti «pedagogika va psixologiya» kafedrasi

Oliy ta’lim o‘rta maxsus, kasb-hunar ta’limi asosida ikki bosqich (bakalavriyat, magistratura)da tashkil etiladi, yo‘nalishlari bo‘yicha xalq xo‘jaligining turli sohalariga oliy ma’lumotli mutaxassislarni tayyorlaydi. Oliy ta’lim muassasalariga talabalarni qabul qilish davlat grantlari va pullik-shartnomaviy asosda amalga oshiriladi.
Oliy ta’limning bakalavriat bosqichi yakunlangandan so‘ng bitiruvchilarga davlat attestatsiyasi yakunlariga ko‘ra ixtisoslik yo‘nalishi bo‘yicha “bakalavr” darajasi beriladi. Bakalavr davlat tomonidan tasdiqlangan namunadagi diplomga ega bo‘ladi.

Oliy ta’limning magistratura bosqichi yakunlangandan so‘ng bitiruvchilarga davlat attestatsiyasi yakunlariga ko‘ra ixtisoslik yo‘nalishi bo‘yicha “magistr” darajasi beriladi. Magistr davlat tomonidan tasdiqlangan namunadagi diplomga ega bo‘ladi.

Oliy o‘quv yurtidan keyingi ta’lim jamiyatning oliy malakali ilmiy va ilmiy-pedagog kadrlarga bo‘lgan ehtiyojlarini qondirish, shaxsning kasb-hunar manfaatlarini qanoatlantirishga qaratilib, mustaqil tadqiqotchilik faoliyatini tashkil etish asosida amalga oshiriladi.
Uzluksiz ta’lim tizimining mazkur bosqichi oliy o‘quv yurtlari va muayyan yo‘nalishlarda faoliyat olib boruvchi ilmiy-tadqiqot muassasalari (aspirantura, ad’yunktura, doktorantura, mustaqil tadqiqotchilik asosi)da tashkil etiladi. Oliy o‘quv yurtidan keyingi ta’lim bosqichlari (aspirantura, doktorantura) tanlangan ixtisoslik yo‘nalishi bo‘yicha nomzodlik va doktorlik dissertatsiyalarining himoyasi bilan yakunlanadi. Mutaxassislar yakuniy davlat attestatsiyasi natijalariga ko‘ra tegishli ravishda fan nomzodi va fan doktori ilmiy darajasi va mazkur darajani tasdiqlovchi davlat tomonidan tasdiqlangan diplomga ega bo‘ladilar.
Kadrlar malakasini oshirish va ularni qayta tayyorlash jarayonida asosiy e’tibor mutaxassislarning kasb bilimlari va ko‘nikmalarini yangilash hamda chuqurlashtirishga qaratiladi. Uzluksiz ta’lim tizimining mazkur bosqichida malaka oshirish va qayta tayyorlash jarayonidan o‘tgan mutaxassislar ta’lim muassasasidagi o‘qish natijalariga ko‘ra davlat tomonidan tasdiqlangan namunadagi guvohnoma yoki sertifikatga ega bo‘ladilar.