Умурзоқов Ў. П., Тошбоев А. Ж., Тошбоев А. А. Фермер хўжалиги

1.3. Фаннинг мақсади, вазифаси, предмети, фанлар билан алоқаси ва усуллари

Бозор иқтисодиёти шароитида халқ хўжалигининг барча тармоқлари бир–бирлари билан узвий боғланган ҳолатда фаолият кўрсатади. Тармоқни ривожлантириш ҳукумат томонидан қабул қилинган қонунлар ва иқтисодий ислоҳотлардан кенг фойдаланишни тақазо этади. Шу мақсадда “Фермер хўжалигини ташкил этиш ва уни иқтисоди” фани аграр соҳани ривожлантиришда самарали хизмат қилади. Бу фан иқтисодий фан бўлиб, фермер хўжалигида маҳсулот ишлаб чиқаришни кўпайтиришнинг самарали йўллари, ишлаб чиқариш муносабатлари ишлаб чиқарувчи кучлар; объектив иқтисодий қонунларни амалиётга тадбиқ қилиш; хўжаликни бизнес режа асосида юритиш; фермер хўжалигига раҳбарлик қилиш; ишлаб чиқаришга фан-техника янгиликларини ва илғор тажрибаларни жорий этиш; пул-кредит муносабатлари; арзон ва сифатли маҳсулот ишлаб чиқариш йўлларини кўрсатади.
“Фермер хўжалиги иқтисоди ва уни ташкил этиш” фани қуйидаги иқтисодий фанлар билан “Иқтисодиёт назарияси асослари”, “Қишлоқ хўжалиги иқтисоди”, “Бизнес режа”, “Тадбиркорлик”, “Иқтисодий статистика”, “Менежмент”, “Маркетинг”, “Молия”, “Солиқ”, “Суғурта” ва бошқа фанлар билан узвий алоқададир.
“Фермер хўжалигини ташкил этиш ва уни иқтисоди” фани қишлоқ хўжалик маҳсулотларини етиштирувчи фермер хўжаликлари тўғрисида қабул қилинган иқтисодий қонунларни ишлаб чиқаришга тадбиқ қилиш ва маҳсулот етиштиришдан иборатдир.
Фаннинг предмети – фемер хўжалигини ташкил этишнинг ҳуқуқий-иқтисодий асосини, ишлаб чиқариш фаолияти ва унга хизмат қилувчи инфратузилма, иқтисодий қонунларни тадбиқ қилиш, моддий таъминот ва корхоналар ўртасидаги иқтисодий муносабатлари, ишлаб чиқариш кучлари, ишлаб чиқариш муносабатлари ва иш юритишда меҳнат унумдорлигини оширишни ўрганишдан иборатдир. “Фермер хўжалигини ташкил этиш ва уни иқтисоди” фани қишлоқ хўжалигидаги иқтисодий самарадорликни, қонунлар ўзгаришини ва жамият ривожланишини ўрганиб синтез қилиб туради. Фермер хўжалиги тўғрисидаги иқтисодий қонунлар хўжаликини ижобий ривожлантириш учун хизмат қилади.