Umumiy o‘rta ta’lim maktablari o‘qituvchilari o‘rtasida

Umumiy o‘rta ta’lim maktablari o‘qituvchilari o‘rtasida
“Quvnoq startlar” sport musobaqalarining respublika (final) bosqichini tashkil etish va o‘tkazish tartibi to‘g‘risida
NIZOM


1-bob. Umumiy qoidalar

1. Mazkur Nizom Xalq ta’limi vazirligi tizimidagi umumiy o‘rta ta’lim maktablari o‘qituvchilari o‘rtasida “Quvnoq startlar” sport musobaqasining (keyingi o‘rinlarda musobaqa deb yuritiladi) respublika (final) bosqichi tashkil etish va o‘tkazish tartibini belgilaydi.

2. Musobaqa Toshkent shahridagi sport majmuada joriy yilning iyun oyida o‘tkaziladi.


2-bob. Musobaqaning maqsad va vazifalari

3. Musobaqani tashkil etish va o‘tkazishning maqsadlari quyidagilar hisoblanadi:

jismoniy tarbiya va sportni rivojlantirish, harakatli o‘yinlarni ommalashtirish, o‘qituvchilar o‘rtasida do‘stona aloqalarni yanada kuchaytirish;
o‘qituvchilarda jismoniy tarbiya va sportga bo‘lgan havas va intilishni hamda jamiyatimizda sog‘lom turmush tarzi tamoyillarini kuchaytirish.
4. Musobaqaning vazifalari quyidagilardan iborat:
barcha o‘qituvchilarni jismoniy tarbiya va sport mashg‘ulotlariga uzluksiz shug‘ullanishga jalb qilish;
o‘qituvchilarning darsdan bo‘sh vaqtlarini sport bilan mazmunli o‘tkazishlari uchun yo‘naltirish;
sog‘lomlashtirish va ommaviy sport ishlarini zamon talablari darajasida rivojlantirish;
“Quvnoq startlar” sport musobaqalarining respublika (final) bosqichi g‘oliblarini aniqlash va ommaga yetkazish.


3-bob. Musobaqani o‘tkazishga rahbarlik qilish

5. Musobaqani o‘tkazishga tayyorgarlik ko‘rish hamda o‘tkazishga umumiy rahbarlik qilish umumiy o‘rta ta’lim maktablari o‘qituvchilar o‘rtasida “Quvnoq startlar” sport musobaqasi respublika (final) bosqichini tashkil etish va o‘tkazish bo‘yicha tashkiliy qo‘mita (keyingi o‘rinlarda - Tashkiliy qo‘mitasi deb yuritiladi) tomonidan amalga oshiriladi.