Умумий ва ноорганик кимё институти ҳузуридаги илмий даражалар берувчи dsc

Муаммонинг ўрганилганлик даражаси. Тадқиқот мавзусига доир илмий-техникавий адабиётларда ўрганилаётган объектнинг дисперс тизимларда коллоид-кимёвий жараёнлар (адсорбция, десорбция) ни ўрганиш ва тартибга солиш, уларни такомиллаштириш масалалари муҳокама қилинади. Ўзбекистонда коллоид кимё соҳасида академик К.С. Ахмедов бошчилигида илмий мактаб яратилган бўлиб, унинг вакилларидан Э.А. Арипов, Ф.Л. Глекель, С.С. Хамраев, С.Н. Аминов, А.А. Агзамходжаев, У.К. Ахмедов, Г.У. Рахматкариев, Ишанходжаев С., В.П. Гуро, С.З. Мўминов, Г.Р. Нарметова, И.К. Сатаев, О.К. Бейсенбаев, З.Тожихўжаев, И.Д.Эшметов, Д.С.Салиханова, Д.Жумаева ва бошқалар унинг ривожланиши учун салмоқли ҳисса қўшганлар. Шуни таъкидлаш керакки, кейинги пайтларда турли саноат корхоналарида ҳосил бўладиган техник ва оқова сувларни юмшатиш, зарасизлантириш ва уларни технологик сув сифатида қўллаш устида олимларимиз томонидан ишлар олиб борилган, лекин бу ишларда асосан четдан валюта эвазига келтириладиган, адсорбентлардан фойдаланилган. Бизнинг усул эса техник ва оқова сувларни юмшатиш ва тозалаш жараёнларини экологик тоза табиий минераллардан олинган модификациялаган глауконитдан фойдаланиб амалга оширишдан иборат бўлиб, бу маълум миқдорда иқтисодий самара келтириши билан бирга йилдан йилга танқис бўлиб бораётган ичимлик сувини тежаш имконини беради ва сув ресурсларидан оқилона фойдаланиш натижасида сезиларли экологик самара келтириши мумкин.
Тадқиқотнинг диссертация бажарилган олий таълим ёки илмий-тадқиқот муассасасининг илмий-тадқиқот ишлари режалари билан боғлиқлиги. Диссертация тадқиқоти Умумий ва ноорганик кимё институтининг илмий тадқиқот ишлари режасининг ФА-А13-Т159 «Техноген чиқиндилар ва технологик эритмалардан рангли ва нодир металларни ажратиб олиш технологияси» (2012-2014 йй.) мавзусидаги амалий лойиҳа доирасида бажарилган.
Тадқиқотнинг мақсади турли саноат корхоналари техник ва оқова сувларини модификацияланган глауконит асосида олинган адсорбент ёрдамида юмшатиш ва тозалашнинг замонавий, экологик ҳавфсиз технологиясини яратишдан иборат.