Умумий ўртатаълим мактаб амалиётчи психологлари малакасини ошириш курсининг мутахасисслик буйича давлат талаблари, ЎҚув-мавзу режа, дастур

Жим ўтирадиган, индамас иштирокчиларни гуруҳ ишига жалб қилиш.
Бошловчи уларга қийин бўлмаган саволлар билан мурожаат қилиши мумкин, уларни жуфтликлардаги машқларга кўпроқ жалб этиши, ролли ўйинларда уларга етакчи ролларни бериши, уларнинг ташаббусларини қўллаши, гуруҳнинг ҳамма аъзоларининг фикрини давра бўйлаб сўраши керак.
Қаршилик кўрсатиш - ўзини ҳимоя қилиш. Баъзи иштирокчилар жуда кўп ички муаммоларга эга бўлиши мумкин, бундай ҳолат гуруҳ қоидаларига бўйсунмасликда кўриниши мумкин. Масалан, баҳсга чақирув; ишончсизлигини очиқ намоён қилиш; бошловчини низоларга ундаш (бунда иштирокчи бошловчи ўзини бошқалардай тутадими ёки йўқми эканлигини текшириб кўрмоқчи бўлади); агар бошловчи бундай "бузғунчи" иштирокчиларнинг қилиқларига эътибор бермаса, улар ҳеч нарса гапирмай жим ўтириш реакцияси орқали жавоб беришлари мумкин. Иштирокчининг қаршилиги у конструктив равишда намоён эта олмайдиган ички зўриқиши билан боғлиқ бўлиши ҳам мумкин.
Бошловчи нима қилиши керак? Иштирокчи билан алоҳида гаплашиб олиши; агар гуруҳда битта шундай иштирокчи бўлса, унинг ичидаги гапларни айта олиши учун имконият яратиши; уни нима қийнаётгани, ғазаблантираётгани ҳакида гаплашиш, фаол ишлаш услубларидан фойдаланиш яъни зўриқиш, агрессияни сусайтирувчи ўйинларни қўллаш керак.
Баҳсларда кўпчилик иштирокчилар ҳар доим ҳам ўз фикрларини мулойим баён эта олмайдилар ва низоларни ҳал этиш йўл-йўриқларини билмайдилар. Бошловчи нима қилиши керак? Баҳсни мунозарага айлантириш, иштирокчи қўпол равишда баён этган фикрни қайтадан тўғрилаб айтиш, иштирокчилар ўз фикрларини очиқ баён этишларини сўраш ва шундан сўнг бошқалардан бирон томоннинг фикрига қўшилишларини сўраш ёки шахсий фикрларини айтишга ундаш керак.
Гуруҳ аъзолари ўртасида, кичик гуруҳлар орасида ёки бошловчи ва иштирокчи муносабатларида низонинг пайдо бўлиши.
Агар гуруҳдаги иштирокчилар ёки кичик гуруҳлар ўртасида ўзаро низолар келиб чиқса, низони конструктив йўл билан ҳал этиш лозим; агар бошловчи ва иштирокчи ўртасида низо пайдо бўлса, бошловчи ўз ҳиссиётларини баён этиб иштирокчи билан гаплашишга уриниб кўриши, компромиссга келишга уриниши ва кези келганда ўз хатосини тан олиши керак. У қуйидаги қоидани эсда тутиши керак: "Бошловчи ҳамма иштирокчиларга албатта ёқиши ва ўзи ҳам ҳаммани яхши кўриши шарт эмас, улар бир-бирларини яхши кўришга ҳам мажбур эмаслар!"